SHILLONG: A·chik jatni namgnina kamrangko ka·na gita je a·dokrangon A·chikrang kraa gita jelbra jelsuachim, uandakgipa a·dokrango All India Garo Union (AIGU)-ko kulina gita dorgastorangko nienba ra·chakanggen ine AIGU Hq Shillong-ni secretary general Diplu G Momin parakataha.
India a·songni pilak kona noksikrango songdongenggipa A·chikskarangna ia gital 2025 bilsini namgipa skaniko on·atengon, “Ia 2025 bilsio Isolni dilaniko man·an baksa, All India Garo Union (AIGU) HQRS. Shillong, Meghalaya, mondoliko, songko-nokko, A·chik songsalko dilenggiparang, political dilgiparang, aro AIGU Regional Unit dolanti baksa songna nokna a·songna aro A·chik jatni dedrang su·drangna nambata knalna apsan jatsan ku·mong nangrimgrike ja·ku de·aniko ia 2025 January ja a·bachenggipaonin AIGU pilak jatni dilgiparang baksa kamko ka·na jotton ka·anggen aro an·ching All India Garo Union (AIGU) HQRS. Shillong, Meghalaya, ian sorkario register ka·gimin dol ong·a. Uni gimin All India Garo Union-ni niam rongdiko pangchake, India-ni bako dingtang dingtang a·dokrango songdongenggipa A·chik jat, jekai Meghalaya, Assam, West Bengal, Tripura, Nagaland aro chu·onga gita A·chik manderang donggipa biaprango gital AIGU Regional Unit aro Branch-rangko AIGU-ni niam rongdiko maming neng·nikani dongjagenchimode AIGU HQRS. Shillong, Meghalaya jatni namroro silroroanina ine an·tangtangko kang·kare kae re·baenggipa pilak A·chik member-rangni proposal ba application-rangko nigrike permission on·anggen. Unbaksanaba gitcham AIGU Regional Unit-rang, jerangan AIGU Headquarters Shillong, Meghalaya baksa bak ong·gija bon·chipe dongengachim, ua AIGU Regional unit-rangna gital Executive Member-rangko nigrike seokangtaigen aro jatsan apsan ku·cholsan ong·e ia a·bachenggipa bilsioni jatni nama miksonganina kam ka·anggen,” ine AIGU Hqr Shillong-ni secretary general Diplu G Momin parakataha.
