TURA: Garo Hills-ni dingtang dingtang biaprango manderangko aro manderangni dongchakgipa nok-jamrangko mongmarangni nisie galanirang batroroengon, Sombar pringoba West Garo Hills a·jani Tikrikilla Police Station ning·o donggipa Kurung Saltop songo, mande saksako mongma doke siattaiaha.
Koborko on·ani gitade, Sombar pringni 5:00 bajimango, bilsi 62 ong·gipa Harwit Marak, nokoni ong·katangengachim indiba ua somoio uni re·angenggipa ramao ua dolsa mongmarangko chagrongdikeaha. Rang·san mongmarangko nikenba ua katsrapjaha aro mongmarangchi dokako man·e ua biapon ia mande sina nangaha.
Ia songrango, mi aro dingtang dingtang cha·anirang dongani gimin mongmarang, cha·anirangko sandie ia songrangona re·baronga aro uandaken songni manderang bang·a somoirangon kenchipchipe dongna nangtokrongachim.
Garo Hills-ni bang·a biaprangon mongmarangni dongchakgipa biaprango aro mongmarangni ramarango manderang, songdong a·chaktokengahani gimin aro bagan barirangko daktokengani gimin mongmarang, ma·brange da·o manderangni dongchakgipa biaprangona katbrangskana nangtokengahachim. Iani a·selan bang·a somoirangon mongma aro manderangni gisepo chagrongani aro iandakgipa a·sel ong·anirangko nikna man·engachim.