SHILLONG: Garo Hills-oni Assam-ona Brahmaputra chibimako kabate tariangenggipa Dhubri-Phulbari dolongko 2028 bilsiode matchotna ka·dongenga ine Budbar salo, a·dokni Power Minister AT Mondal, kobor ra·timgiparangna parakataha.
“A·bachengo tik ka·samsogimin gitan kamrang matchotangengani gimin ia dolongko 2028 bilsiode matchotna ka·dongenga. Oe beben, ia dolongko rikanio Meghalaya a·dokchipaknide on·tisa ja·manchakenga indiba Assam-chipaknide uamang, ge 34-35 krongrangko songmanahani gimin kamrang kraa gita ta·rakenga,” ine Mondal aganaha.
Meghalaya a·dokchipakni rikenggipa dolongni bakrangko ua an·tangan re·ange nieaha ine u·iatengon, “Official-rangni angna aganani gitade, kamrangko uamang somoi gita ka·enga aro maming a·selrang ong·jagenchimode somoi gitan ia dolongko matchotna ka·dongenga,” ine ua aganaha.
Ia dolongara salgro salaram a·dokrangna dingtanganiko ra·baani gita ong·gnok ine janapatskaengon, “Ia ramara sepangbatengahani gimin ia dolongko rika matchotahaode gari gorarang bang·batan ia dolong gitasa Guwahati songjinmachipakna re·tokgnok aro ia dolong gitan dingtang dingtang bading chiwalani kamrangnaba re·ruratokgnok. Unbaksana Meghalaya a·dokoni a·songni gipin biaprangonaba ia dolongan western entry aro exit gita ong·gnok,” ine Power Minister parakataha.
Ia Dhubri-Phulbari dolongni bakroaniara kilometre 19.3 ong·e India aro Asia-o bakrobatsranggipa dolong ong·enga ineba ua aganaha.
“Ia dolongni bakroaniara km 19.3 ong·a aro bakrobatsranggipa river bridge ba chibimako kabatgipa dolong ine minga. Anga gipin biaprango donggipa chibimani dolongrang badita bakroa ukode ma·sija indiba ia dolongo ge 199-na baten krongrang dongna siengani gimin ian namen bakrobegipa dolong ong·enga,” ine Mondal aganaha.
Dhubri-Phulbari dolong aro Balurghat-Hili-Mahendraganj ramako matchotahaode ian South-Asian a·songrang baksa bading chiwalgrikna cholrangko oe on·gnok ineba Power Minister parakataha.
Da·o dipet North Bengal gitasa a·songni gipin bakrangona re·na nangengani a·sel salgro salaram jolni manderangna neng·nikanirang ong·engani gimin ia project-ara salgro salaram jol gimiknan namgni ong·gnok ineba ua aganaha.
Dhubri-oni Phulbari-ona taribaenggipa dolongko rikna gita 2019-2020 bilsirango a·bachengahachim aro ian Dhubri-oni Tura, Nongstoin aro a·dokni gipin biaprangonaba rama gita songreani chol ong·gnok.
Ia dolongko gong kror 4,997 korosrangchi rikenga aro ian chibima dilgniko chobate songrena nanggipa Assam aro Meghalaya a·dokni manderangna namgni ong·gnok.