President Droupadi Murmu, M’laya-ona re·bana man·jaha

SHILLONG: India a·songni President Droupadi Murmu, Bristibar salo Meghalaya a·dokona re·bana am·aniko mikka simdimahani a·sel dontongatna nangaha.

India a·songni President Droupadi Murmu, Bristibar salo, Ri Bhoi a·jani Umiam-o donggipa Indian Council of Agriculture Research (ICAR)-ni bilsi 50 gapaniko a·bachengate on·na re·baani ong·achim indiba ia salo mikka simdime dongahani a·sel ua re·bana gita man·jaha.

Ia manchigimin salo ua re·bana man·jahaoba, ja·mano dingtang tarikko tik ka·e a·dokona re·baskagen aro uni re·baani tarikko ja·mano u·iatgen ine Ri Bhoi a·jani Superintendent of Police (SP) parakataha.

Umiam-o donggipa ICAR, batanggimin bilsi 50-na India a·songni salgro salaram jolo game ge·e cha·enggiparangna aro songadam nokadamrango donge janggi tangenggipa manderangna bang·en on·gilanirangko dakangaha aro ia ICAR-ni bilsi 50 gapaniko manianio, a·songni President Droupadi Murmu re·bae bakko ra·pana man·jahaoba ia manianio, Union Agriculture & Farmers Welfare Minister Shivraj Singh Chauhan, Meghalaya a·dokni Governor CH Vijayashankar aro a·dokni Chief Minister Conrad K Sangma bak ra·angskaaha.

Ia ICAR-North Eastern Region (NER)-ko 1975 bilsini January 9 tariko a·bachengataha aro ian India a·songni salgro salaram jolrango game ge·e cha·enggipa manderangni janggi tangani gadangko tang·doatna miksonge a·bachengatgipa ong·achim.