SHILLONG: Sukrobar salo, Cabinet tom·aniko East Khasi Hills a·jani Sohra-o ong·atanio a·dok sorkari, neng·nikanirangko chagrongna nangenggipa game ge·e cha·giparangko dakchakna ‘CM Assure’ scheme-ko ra·chakangaha.
Ia scheme-ara, a·sel ong·ani somoirango duko ga·akenggipa game ge·e cha·giparangko dakchakna sorkarini a·bachengatenggipa scheme ba program ong·a aro ia scheme-ni ning·o sorkari, sal·wa, gue ba uandake gimaninggijagipa bosturangko breskaenba, marketing board gita palskana miksongenga.
Ia program-ni ning·o a·dok sorkari, gong kror 100-ko on·dape, ma·mong sorkarini gong kror 20 dakchakanikoba on·na miksongenga.
Ia cabinet tom·anio gimik ming 13 agenda-rangni gimin chanchirimangaha aro ia tom·a matchotani ja·man kobor ra·timgipa manderangna talataniko on·angengon, bazar antirango dam tang·onanichi game ge·e cha·giparangni neng·nikanirangko namatna gita sorkari ‘CM Assure’ program-ko a·bachengatenga ine a·dokni Chief Minister Conrad K Sangma parakataha.
“Sal·wa aro guerangni dam pangnan tang·onrongani a·sel game ge·e cha·giparang neng·nikanirangko chagrongna nangrongenga. Uni giminsa iandake neng·nikanirangko chagrongengmiting somoirango game ge·e cha·giparangko dakchakna sorkari, ia scheme-ko a·bachengataha,” ine Sangma aganaha.
Indake ong·engon, 2007 bilsina skang adhoc basis-o kamo rakkia man·gipa sak 850 kam ka·giparangko regularize ka·na gitaba ia tom·anio Cabinet ra·chakangaha. Chief Minister-ni u·iatani gitade, ia sak 850 manderang, 2022 bilsio sak 3000 kam ka·giparangko regularize ka·na segatanio watchanggalako man·ahani gimin Cabinet, ia sak 850 manderangkoba kamo regularize ka·na ra·chakangaha.
Sukrobar salo ong·atanggipa Cabinet tom·aniara, January-ni 10 aro 11 tariko salgnina Sohra-o Cabinet Retreat-ko ong·atani bak gita ong·achim.
Ia Cabinet Retreat-ko ong·atani miksonganiara dingtang dingtang sorkari department-rangna, an·tangtangni program-rangko mesoke on·na aro dingtang dingtang neng·nikanirangko apsan chanchirime miksonganirangko chu·sokatna chol on·anian ong·engachim.
