SHILLONG: Assam aro Meghalaya a·dokni simarango ong·enggipa golmalrangko namatna man·kujaengani gimin aro Assam sorkarini sinjetanirangko chel·chakna man·jaengani re·baenggipa February jani 21 tariko ong·atna sienggipa Jaintia Hills Autonomous District Council (JHADC) election-o West Jaintia Hills a·jani Mukroh songo donggipa manderang bak ra·jana tik ka·angaha.
Adita salrangna skang, Mukroh Pyllun songni dilgiparang, Musher-Mukroh songo tom·aniko ong·atangenba, JHADC election-o bak ra·jana tik ka·angaha aro iani bidingo West Jaintia Hills a·jani Deputy Commissioner-naba seachi u·iataha.
JHADC election-o bak ra·jana gita tik ka·angengon, Assam aro Meghalaya a·dokni sima jolo donggipa Mukroh songo, Assam-o songdongenggipa manderangni sinjetanirangko chel·chakna man·jaengani gimin Meghalaya sorkariko matnangataha.
Mukroh song ning·o forest beat house-ko rika aro Khlieh Sanaro-oni Umlaphiah Mukroh-ona rama taridraa ineba songni manderang, Assam sorkariko matnangataha.
2022 bilsini November 22 tariko, dolgni dinggrikanichi mande sakbonga sina nangaha indiba da·alonan ia manderangni nokdangrang, kakket bichalko man·kujaenga ineba Mukroh songni manderang matnangataha.
Ia songni manderangna Meghalaya sorkari, maming dakchakanirangko on·jaengani a·sel songni manderang, Assam-chipakna kenchipchipe janggi tangna nangtokenga ineba ia songni manderang parakataha.
District council election-o uamangni bak ra·paaniko nangnikenga ong·ode songni manderang baksa agangrikna nanggen ineba Mukroh songni manderang, a·dok sorkario dabiangaha.
