SHILLONG: Shillong songjinmani Barik Point-o skywalk-ko rikanichi bilongen traffic jam ong·na nanggen ine nikahani gimin ia project-ko sorkari dontongatchengaha ine Bristibar salo, a·dokni Chief Minister Conrad K Sangma parakataha.
Chief Minister-ni parakatani gitade, ia project-ni kamrangko name nipiltaion, Barik point-o skywalk-ko rikanichi traffic jam ong·aniko bilongbatatgen ine nikahani gimin sorkari, ia project-ko dontongatchengna nangao ga·akaha.
“Skywalk project-ko chinga dontongchengna nangaha maina ia kamko a·bachengahaon, ia ramao traffic jam ong·aniko bilongbatatgen ine am·sandianio mesokaha,” ine Chief Minister, kobor ra·timgiparangna aganaha.
Gipin nambata cholko man·kujaskal sorkari, ia project-ko donchengkuna tik ka·aha ineba ua aganaha.
“Skywalk-ni kamrangko a·bachengna chinga pilakkon chanchisamsoahaoba ia ramao bilsisamangna traffic jam ong·na on·genma ma nambata cholrangko man·kujaskal sengkugen, uko chinga chanchina nangao ga·akaha. Indiba ia ramao traffic jam ong·anichi manderang neng·nikanirangko man·skagen ine nikahani gimin ia project-ko donchengkuna chinga tik ka·aiaha. Ia skywalk-ko tarianiara namen nambegipa ong·genchim indiba kamrangko matchotkujaskal manderang neng·nikanirangko man·skagen ine nikahani gimin chinga ia project-ko donchengna tik ka·aha,” ine Sangma aganaha.
Indake ong·engon, Wahumkhrah-ko nitobatate tarina sorkari, gong kror 30-40-mangna baten tangkarangko chamatmanaha ineba Chief Minister parakataha.