SHILLONG: Meghalaya a·doko kam ka·e cha·enggiparangna a·dok sorkarini, hajira bariataniko Meghalaya State Council (MSC)-ni All India Trade Union Congress (AITUC) jegalataha.
Iani bidingo AITUC, a·dokni Chief Minister Conrad K Sangma-na sedoatenba, sorkarini bariatgipa hajirarangara nanga gita ong·jaenga ine parakataha.
AITUC-ni secretary R Thabah-ni parakatani gitade, re·anggipa 2024 bilsini August 6 tariko, Labour department-ni Principal Secretary C Songate-ni dilanichi Minimum Wages Advisory Board-ni tom·aniko ong·atanion, unskilled worker-rangna gong 681, semi-skilled-na gong 749, skilled labour-na gong 824 aro highly skilled worker-rangna gong 906-ona bariatna ku·rachakaniko on·ahachim.
Ia sal somoirango pilak bosturangni damrangan tang·doengahani gimin kam ka·e cha·giparangna hajirako komiate on·aniara, kam ka·e cha·enggipa manderangna namen neng·na nanganiko ra·baenga ineba Thabah parakataha.
“Kam ka·e cha·enggiparangna hajirako bariatanio, sorkarini ku·chakgimin gita ong·jahani gimin chinga namen suk ong·ja,” ine AITUC-ni secretary parakataha.
Adita salrangna skangsan a·dokni Cabinet tom·e chanchirimangenba, sak 85,000-na batgipa labour ba hajira kam ka·e cha·enggipa manderangna minimum wage ba onbatgipa hajirako bariatna tik ka·angahachim.
Unskilled labour-rangna salprako gong 419-oniko gong 525-ona, semi-skilled labour-rangna gong 474-oniko gong 565-ona, skilled labour-rangna salo gong 530-oniko gong 605-ona aro highly skilled labour-rangna salo gong 586-oniko gong 654-ona hajirako bariatna Cabinet tik ka·ahachim.