TURA: Garo Hills Autonomous District Council (GHADC)-o dingtang dingtang project-ni tangka paisarangko jakkalsreta ine matnanganirangko man·ahani gimin GHADC-ni chief executive membor (CEM) Albinush R Marak, GHADC-ni gitcham secretary Rikse R Marak, gitcham superintending engineer aro kamko jako ra·gipa contractor-rangni kosako inquiry-ko dakchina Meghalaya Lokayukta, Prosecution Director-na ge·etaniko on·angaha.
Siju constituency-na chamatgipa ming 123 project-rang mitamde matchotchipja aro mitamkode galchipaha ine saksa social activist Faming B Marak-ni badi ka·ani ja·man, iani bidingo sandirokchina gita Meghalaya Lokayukta, January-ni 21 tariko ge·etaniko on·ataha.
Ia project-rangko name nichenggija, 60 percent-kode contractor-rangna gamaha ineba Marak badi ka·doangahachim.
South Garo Hills a·jani Siju constituency-ni ning·o ming 123 project-rangko matchotja inenba Flaming Marak baksana Nilberth Ch Marak, GHADC-ni CEM Albinush Marak, GHADC-ni gitcham secretary Rikse Marak, sak 21 contractor aro GHADC-o kam ka·enggipa manderangni kosako badi ka·doangahachim.
Ia manderangni badi ka·ani gitade, 2020 bilsina gong 69,19,980, 2021 bilsina gong 1,60,63,200, 2022 bilsina gong 59,94,600, 12,22,200, 2,39,78,400 aro 2,57,63,200, 2023 bilsina gong 32,20,400 ong·gipa dingtang dingtang project-rangko chamahachim aro ia gimik project-ni damara gong kror 5 batpilachim