TURA: Meghalaya a·dokona niamgri napsrukbaanirang batroroenganina Garo Omniscience for Ethnic Renaissance and Awakening (GOERA) Central Governig Body, sima-ario ong·enggipa obostarangni bidingo ma·mong sorkarina chitti sedoata, indake uamangni Ministry of Home Affairs-na seatgipa chiitio janapani gitade sima arirango chagrongenggipa neng·nikanirangna ta·raken kam ka·china aro border security force-rangko bariatchina aro National Register of Citizens (NRC)-ko jakkale Entry, Exit point-rangko A·doko donchina didiaha. Mongsongbate Bangladesh a·songoni niamgri sima arirangko ga·batbaani batroroenga gimin GOERA kenchakanirangkoba parakataha.
Sima-ari jolrango mongsongbate West Garo Hills-ni Gillagora sima ari gita napbana bang·bate cholko man·enga, ian a·songna kenchakanisan ong·aija, a·dokna so·so-jengjeng ong·aniko ra·bana kenchakaniba ong·enga ine aganan baksa Meghalaya- Bangladesh sima-arirango Border Security Force (BSF) dolrangko bang·dapatchina ma·mong sorkariko GOERA dol didiataha. Unbaksa sima-arirango niamgri napdrabaanirangko niksona man·a gita CCTV-rangko donchinaba organization janapangaha.
Minggipin chittio janapanira Meghalaya Residents Safety and Security Act, 2016-ni gita entry exit point-rangko ta·raken donchina aganaha, maina ia point-rangko donanichi niamgri napdrabaaniko champengsona gita dakchakani ong·gen, jedakode uamangko see rakkienba ja·mano niam gita watatpilna man·gen. Unbaksa Meghalaya-o aro Assam-oba changgni dake vote on·aniko namedake sandichina gitaba mol·molangaha, jeon mongsongbate a·kawe jol jedake Raksamgre, Tikkrikilla, Phulbari, Rajabala aro Selsela jolrangniko sandiako dakchina GOERA mol·molangaha.
