Gitcham bobil dolni mande saksako pistol pongsa baksa rim·a

TURA: A·chik National Volunteers Council (ANVC-B) bobil dolni gitcham membor saksako Robibar salo, East Garo Hills a·jani police-rang, niam gri pistol ra·bitani gimin rim·aha.
Iani bidingo kobor ra·timgiparangna u·iatengon, niam gri silchidare ra·bitgipa mandeni bidingo koborko man·soani ja·man police-rang am·sandiangenba, ia mandeko uni niam gri ra·bitgipa pistol baksa rim·na man·aha ine East Garo Hills a·jani Superintendent of Police (SP) SA Rynjah parakataha.
Rim·ako man·gipa mandeara, Rongjeng Police Station-ni ning·o donggipa Silchanggittim songni bilsi 44 ong·gipa Mexbal K Marak ba Menil ine mingklakgipa ong·achim aro uko police-rang, Baringgre Chambildam minggipa songoniko rim·na man·aha ineba SP parakataha.
Ia mandeni bidingo sing·sandion, ua gitcham ANVC-B bobil dolni membor ong·achim aro ua 2008 bilsio, ANVC-B dolo napahachim ine ma·sina man·aha.
SP-ni parakatani gitade, 2015 bilsio ANVC bobil dolrangni sorkari baksa songgigrike soi ka·grikanio ia mandeba, an·tangko bame on·aha.
Adita salrangna skangmangmangsan East Garo Hills a·jani Rongjeng jolonikon police-rang, GNLA bobil dolni dongnue donanggipa silchidare aro gulirangko bang·en man·taiahachim.