SHILLONG: India aro Bangladesh a·songni simarangko fencing kaanio, South Garo Hills a·jani dol 82 nokdangrang, Bangladesh a·songchipakna jitatako man·engani gimin ia nokdangrangko India a·songchipakna ra·bapilna man·na gita ja·kurangko de·china Tura-ni Congress MP Saleng A Sangma, ma·mong sorkariko didiangaha.
“A·song damgnini simarango donggipa manderang, duk chake aro kenanirang baksa songdong a·chana nangtokenga ine anga Parliament-na u·iatna ska. Ia sima jolrango songdongenggipa nokdangrangko fencing kaani ja·man a·songoniko a·pal gala gita ong·enga indiba uamangara an·chingni manderangan ong·achim. Ia nokdangrangko apjitbapilna man·jagenchimode uamang nangchongmota kamrangnaba attam 5 bajini ja·mande India a·songona re·napbana man·jaengaha,” ine Sangma, Lok Sabha-ni Session-o aganaha.
“Uni gimin ia nokdangrangko ta·raken India a·songona apjitbapilchina anga didienga,” ineba ua aganaha.
India aro Bangladesh a·song damgnini simarangko fencing kaanio, ia dol 82 nokdangrang a·song damgnini simaona jitatako man·engaha aro ia nokdangrangara India a·songchipakba ong·ja aro Bangladesh a·songchipakba ong·ja dake dongna nangengaha ine adita salrangna skangsan, a·dokni Cabinet Minister aro Siju-Rongara constituency-ni MLA Rakkam A Sangma parakatahachim.
“Ia nokdangrangko India a·song ning·ona rimbapilna man·na gita chinga Home Affairs Ministry baksa agangrikenga aro da·o MHA-ni aganchakanina sengkuenga. Siju Rongara constituency-ni ning·o simarangko kaanio niam gita kajaengani a·sel iandake bang·a nokdangrangan a·songoni a·pal galako man·na nangenga,” ine Sangma aganaha.
Border fencing-ko zero line-oni 150 yards-onasa kana nangachim indiba simarangko Meghalaya a·dok ning·o metre 150-oni metre 500-mangona kaskaengani a·sel India a·songni bang·a a·arangkon Bangladesh a·songchipak man·angskaenga ineba Sangma aganaha.