AMPATI: Ma·mong sorkarini ra·gatgipa ‘Beti Bachao, Beti Padhao’ program-ni bilsi 10 gapaniko maniani bak gita Bristibar salo, South West Garo Hills a·jani Social Welfare department aro District Hub for Empowerment of Women (DHEW), Krima No. VI Youth Ministry baksa nangrime, dingtangmancha awareness program-ko Nogorpara-ni Borang Resort-o ong·atangaha.
Ia BBBP program-ni bilsi 10 gapaniko maniani bak gita January 22 tarikoni March 8 tarikona dingtang dingtang program-rangko ong·atenga aro ian me·chikrangna lekka poraniko on·na aro mangrakbatatna miksongani ong·enga.
Ia awareness program-ko ong·atanio, Krima VI-ni ning·o donggipa damchet mondolini pamongrang, sak 350 chadamberang aro dingtang dingtang department-ni official-rangba bak ra·angtokaha.
Ia awareness program-ko ong·atanio dingtang dingtang katta bichongrangni bidingo dingtang dingtang official-rang, agan-talatanirangko on·angaha aro uan BBBP scheme awareness-ni bidingo DHEW-ni Gender Specialist Chairy R Marak, Mental Health Awareness-ni bidingo Ampati Civil Hospital-ni Clinical Psychologist Lenibell Dokatchi Marak, POCSO Act-ni bidingo LCPO Taniya Derimchi Marak aro Domestic Violence-ni bidingo Case Worker Beggimme Sangma ong·a.
Iana agreba ia program-ko ong·atanio quiz competition aro kal·susaanirangkoba ong·atangaha aro chegiparangna Rev Paramsing Sangma aro Taniya Derimchi Marak-ni jakchi boksisrangko suale on·angaha.