AMPATI: Bi·sarangko an·seng baljoke rakkina gita South West Garo Hills a·jao tika su·ani aro sanna bananirangko namdapatna gita Bristibar salo, South West Garo Hills a·jani Deputy Commissioner Hema Nayak-ni dilanichi, Immunization-ni District Task Force, Child Death Review (CDR) aro Bio Medical Waste (BMW)-ni bidingo tom·aniko, Ampati-o donggipa DMHO conference hall-o ong·atangaha.
Ia tom·anio, South West Garo Hills a·jani Block Development Officer (BDO)-rang aro Education, Social Welfare aro Health department-ni official-rangba bak ra·angtokaha.
South West Garo Hills a·jao bi·sa bakgitchakrangko tika su·ani bidingo nipilangengon, 2025 bilsini January jaona kingking 97 percent gapaha ine nikna man·aha indiba ja 16-24, bilsi 5, bilsi 10 aro bilsi 16 ong·gipa bi·sarangna tika su·anirangsa nanga gita ong·kujaenga ine nikna man·skaaha.
Ia tom·aniko ong·atani bidingo jinmana talate on·angengon, sabisi sakanchirangoniko chel·chake rakkina aro bi·sarangko an·seng baljoke rakkina somoi gita tikarangko on·na nangani gimin South West Garo Hills a·jani Deputy Commissioner Hema Nayak aganangaha.
Iani bidingo dingtangmancha special immunization campaign-ko ia February jani brigipa antio, songadam nokadamrango ong·atangenba, bi·sarangna tikarangko on·anggen ine DC parakataha. Unbaksana, Tetanus aro Diphtheria vaccination campaign-koba March jani skanggipa aro gnigipa antirango, bilsi 10 aro bilsi 16 ong·gipa chatro chatrirangna pilak skulrangon ong·atanggen ine DC parakataha.
Child Death Review (CDR)-ni bidingo chanchirimanio, SWGH a·jani District Maternal & Child Health Officer Dr Noreen Sangma, jinmana aganprakengon, 2024 bilsini April aro 2025 bilsini January jani gisepo bi·sarangni siani chu·gimik report-rangko mesoke on·angaha.
South West Garo Hills a·jao Infant Mortality Rate (IMR) ba bi·sa bakgitchakrangni sianiko komiatna gita pilak department-rangkon bakrime kam ka·china gitaba ia tom·anio Deputy Commissioner didiangaha.