BAGHMARA: South Garo Hills a·jani Sangknigre songo, Jal Jeevan Mission (JJM)-ni kamrangko matchotchipkujaenga ine Budbar salo, Garoland State Movement Committee (GSMC) Ashuragre regional unit aro Federation of Khasi Jaintia & Garo People (FKJGP) Chokpot circle, ia kamko ka·enggipa contractor-ni kosako Police-rangna FIR ka·doangan baksana South Garo Hills a·jani Deputy Commissioner-naba badi ka·doangaha.
Ia JJM-ni kamrangko nina re·angani ja·man dolgni NGO-rang, ia kamko ka·enggipa contractor Morjina Marak aro uni segipa Chenang Sangma-ni kosako badi ka·doangaha.
Dolgni NGO-rangni parakatani gitade, ia songni JJM project-na gong 3,48,47,620-ko hisapahachim aro ia project-ko matchotahaode ian Chokpot C&RD Block-ni ning·o donggipa Ala Nokatgre, Ala Rongpakgre, Alagre, Anigre, Asinanggre, Ashugre, Debaigre, Deku Bazar, Gadak Nawepilgre, Ganchi Kalak, Kama Anigre, Nachi Adugre aro Rimrangpara Adinggre songrangna namgni ong·gnokchim.
Ia project-ara Alagre Songgital Combined Water Supply Scheme-ni ning·o ga·akgipa project ong·achim ineba dolgni NGO-rang parakataha.
Ia project-ni bidingo RTI ka·e am·sandion, ia JJM-ni kamrangko 2021 bilsini July 16 tarikon a·bachengate, bilsisani gisepon matchotani ong·achim ine ma·sina man·aha.
Indake ong·genchimoba, ia biapona re·ange nion, ia songrangna da·alona kingkingan chirangko on·na man·kujaenga ine NGO-rang nikna man·aha.
Ia kamko jako ra·gipa contractor aro uni segipa, kamrangko nirokna nangachim indiba iani bidingo songni manderangna ku·rachakna jechakaiaha ine dolgni NGO-rang matnangataha.
Ia JJM project-ni kamrangko a·bachengkujaengoba, tangkode gong kror 1.86-ko oke ra·aha ineba NGO-rang, ia kamko jako ra·gipa contractor-ni kosako matnangataha.
“Ia tangkarangko manderangni namgninasa sorkari chame on·ataha indiba kamko ka·gipa contractor, ia tangka paisarangko jakkalsretaha. Iani kamko matchotatchina chinga uamangko changni chang mol·molahachim indiba uamang kamko chu·sokatchipjahani gimin chinga ia contractor aro uni segipani kosako FIR ka·enga,” ine GSMC Ashuragre unit aro FKJGP Chokpot circle parakataha.