SHILLONG: Khasi Hills Autonomous District Council (KHADC) election-o dam 17 seat-rangko chegope gital Executive Committee (EC)-ko chalaina tariengahaon, ia sak 17 MDC-rangoni sako gital Chief Executive Membor (CEM) songgen, da·o dipet Voice of the People’s Party (VPP) chanchikujaenga.
Iani bidingo sing·anina aganchakaniko on·atengon, “Da·o dipet iani bidingo VPP-ni dilgiparang chanchia dongkujaenga indiba jensalo gital CEM-ko songani bidingo chanchigen, unon jinmana u·iatgen,” ine VPP-ni president Ardent Miller Basaiawmoit parakataha.
Gital MDC-rangni ku·mikchetani aro Chairman-ko seokani ja·mansa CEM-ko songani bidingo chanchigen ineba Basaiawmoit parakataha.
KHADC-ni EC-ko rikna gita VPP-o chu·onga gitan membor-rang dongani gimin uamang EC-ko rikna a·kangena nangjawa ineba VPP-ni president parakataha.
KHADC election-o VPP-ni chu·sokgipa ong·ani bidingo janapatskaengon, ian manderang, VPP-ni miksonganirangko ra·chakahani giminsa ong·a ine Basaiawmoit aganaha.
JHADC election-o bil-jak aro tangka paisarangko jakkalanirang dongjagenchimode ianoba VPP chegopna man·aigenchim ineba VPP president a·kangataha.
Basaiawmoit-ni aganani gitade, Jaintia Hills-o bil-jak aro tangka paisa jakkalaniko district official-rang champengna man·jani a·selsa VPP, seat damchetko chena man·aiahachim.