KHADC-o VPP dam 17 seat-rangko chegopa, JHADC-o NPP dam 13-ko cheskaa

SHILLONG: Ia bilsini Khasi Hills Autonomous District Council (KHADC) election-o Voice of the People’s Party (VPP), gimik dam 17 constituency-rangko chee gital Executive Committee (EC)-ko chalaina tariaha indiba Jaintia Hills Autonomous District Council (JHADC)-ode National People’s Party (NPP), dam 13 seat-rangko chee, apsan bakrimenggipa dolrang baksa gital EC-ko chalaiskana tik ka·aha.
KHADC-o gimik dam 29 constituency-rang donga aro ia election-o VPP, dam 17 seat-rangko, UDP dam 5-ko, NPP dam 4-ko, HSPDP damsako aro Independent candidate sakgniba chena man·aha.
District council-o EC-ko chalaina gita komibeoba sak 15 membor-rangko nanga aro JHADC-o darang party-an dam 15 seat-rangko ba una bate chegipa dongjahani gimin dam 13 seat-rangko chee NPP-an bang·bate chegipa ong·aha.
KHADC-ode VPP, dam 17 seat-rangko cheahani gimin gipin dolrang baksa bakrimna nanggijaan EC-ko chalaina bil man·skaaha.
JHADC-ni gimik dam 29 constituency-oni dam 13-ko NPP, dam 8-ko VPP, dam 3-ko Congress, dam 3-ko UDP aro seat damgniko Independent candidate-rang cheskaaha.
Ia chang KHADC election-o Congress aro BJP dolrangde seat-rangko chena man·rikpajaha aro JHADC-oba BJP aro HSPDP dolrang, seat-rangko cherikna man·jaha.
KHADC election-o chegipa manderangara, Jirang-o Sosthenes Sohtun (NPP), Nongpoh-o Rona Khymdeit (NPP), Mawkhati-o Kynjoh Rangtong (VPP), Umsning-o Banrikus Nongsteng (VPP), Umroi-o Isynei Hinge (VPP), Sohryngkham-o Bill Clinton Wankhar (VPP), Mawkynrew-o Seiborlang Warbah (VPP), Nongkrem-o Kitborlang Syiem (VPP), Lyngkyrdem-Laitkroh constituency-o Shemborlang Rynjah (VPP), Nongshken-o Grace Mary Kharpuri (NPP), Shella-o Barikupar Synrem (UDP), Mawsynram-o Alvin K Sawkmie (NPP), Sohra-o Titosstarwell Chyne (UDP), Mylliem-o Aibandaplin F Lyngdoh (VPP), Laban-Mawprem-o Ricky Shullai (Ind), Nongthymmai-o Winston Tony Lyngdoh (VPP), Malki-Laitumkhrah-o Deity H Majaw (VPP), Mawkhar-Pynthorumkhrah-o Strongpillar Kharjana (VPP), Jaiaw-o Denzil R Chen (VPP), Mawlai-o Eddieson Kharumnuid (VPP), Mawphlang-Diengiei-o Lancaster Marbaniang (VPP), Nongspung-Sohiong-o Synshar Kupar Roy Lyngdoh Thabah (UDP), Mairang-Nongkhlaw-o Equator Nongrang (UDP), Pariong-Mawthadraishan-o Powell Sohkhlet (VPP), Mawkyrwat-o Pynkhrawborlin Kharjahrin (VPP), Langrin-o Pius Marwein (UDP), Nongstoin-o Juristman Iawphniaw (VPP), Rambrai-Jyrngam-o Lurshai Kharbani (Ind) aro Mawshynrut constituency-o Srally Rashir (HSPDP) ong·a.