WILLIAMNAGAR: Garo Hills Autonomous District Council (GHADC)-ni Chief Executive Membor (CEM) Albinush Marak-ni ka·mikkenatgipani bidingo badi ka·anina Williamnagar police station-ni officer-in-charge (OC), maming ja·kurangko de·jaha ine matnangenba, ia police officer-ni kosako East Garo Hills a·jani social activist Nilbath Ch Marak, Meghalaya a·dokni Director General of Police (DGP)-na seachi badi ka·doangaha.
GHADC-ni CEM, uko ka·mikkenatenga inenba re·anggipa January-ni 23 tariko Marak, Williamnagar PS-ni OC-na badi ka·doangahachim ine nikna man·a.
Iani bidingo ua Williamnagar police station-na badi ka·doangahaoba, GHADC CEM-ni kosako maming ja·kurangko de·kuja ine Marak, DGP-na badi ka·doangskaaha.
GHADC-ni Siju constituency-na chamatgipa bang·bea project-ni tangka paisarangko jakkalsreta ine CEM aro dingtang dingtang official-rangni kosako Nilbath Marak baksana Flaming Marak-ni, Meghalaya Lokayukta-na badi ka·doangani ja·man ia obosta ong·aha aro social activist-rangni badi ka·aniko man·enba, iani bidingo inquiry-ko dakchina Meghalaya Lokayukta ge·etaniko on·angahachim.
Indake ong·engon, ia case-ko ra·pilchina gita GHADC-ni CEM, February-ni 22 tariko una phone ka·atenba uko ka·mikkenataha ine Marak, police-rangna badi ka·doangahachim.
Iani bidingo CEM-ni kosako maming ja·kurangko de·chipkujaenga ine matnangatengon, niamo pangchake sipairangde, maming gadangko nigija ja·kurangko de·na nangachim indiba da·alonan CEM-ni kosako ja·kurangko de·janiara bilo ong·enggipa manderangnade ia niamrangara ong·ja ine mesokanisa ong·enga ine Marak, DGP-na sedoatgipa chittio parakataha.
GHADC-ni CEM aro Williamnagar PS-ni OC-ni kosako rakgipa ja·kurangko de·china gitaba Marak, DGP-ko didiataha.