GH-o Int’l Women’s Day-ko manianga

WILLIAMNAGAR/TURA: A·gilsakni gipin biaprango gitan International Women’s Day-ko Sukrobar salo, Garo Hills-ni dingtang dingtang biaprangoba maniangaha.
East Garo Hills a·jao International Women’s Day-ko Williamnagar-ni Bangonggre-o maniangaha aro ia program-ko District Social Welfare department, East Garo Hills a·jani District Sankalp Hub for Women Empowerment baksa nangrime ong·atangaha.
Ia program-ko ong·atanio, East Garo Hills a·jani Additional Deputy Commissioner Diana Sangma, mongsonggipa sokgipa ong·e bak ra·angaha aro ia tom·anio ua jinmana aganprakangengon, a·gilsako me·a aro me·chik pilakan apsan bilko man·na ine mesokna ia International Women’s Day-ko a·gilsak gimikon manirongenga ine talataniko on·angaha.
Lekka pora, an·seng baljokani aro pilak kamrangon me·asa aro me·chikrang apsan cholko man·na nanga ineba Sangma aganaha.
Ia salko maniani bak gita Outreach Health Camp-koba apsan biapon ong·atangjolaha aro ia Health camp-ko ong·atanio songni manderang, an·tangtangko be·enni gita porikka ra·e nina cholko man·an baksana sanna bananirangkoba ra·na man·aha.
Ia International Women’s Day-ko manianio dongpae bak ra·anggipa gipin manderangara, Samanda Block-ni Block Development Officer Tochri Sangma, District Social Welfare Officer Silnang Shira, Additional District Medical & Health Officer BR Marak aro gipinrang ong·a.
Apsan daken, ia International Women’s Day-ko Tura-ni Don Bosco College-oba maniangaha aro ia salko manianio, gitcham IAS Officer Maria Helena K Marak, mongsonggipa sokgipa ong·e bak ra·angaha.
Ia tom·anio ua jinmana aganprakangengon, ia International Women’s Day-ko maniani bidingo agan-talatanirangko on·angenba, a·gilsakko dongtogipa biap ong·atna gitade me·chik bi·sarangna a·gilsakni seng·aniko on·anian ong·a ine parakataha.
Me·asarang gitan me·chikrangnaba lekka poranio aro dingtang dingtang kamrangko ka·anio apsan cholko on·na nanga ineba Marak aganaha.
Ia salko manianio, Tura Municipal Board (TMB)-ni Chief Executive Officer (CEO) Rikse R Marak-ba dongpae jinmana aganprakangengon, an·tangni janggi tanganio chu·sokgijanirangko chagrongna nangahani gimin aro uarangoniko ua maikai skie ra·enba da·alo iandakgipa gadangona sokpana man·ahachim, uarangni bidingo me·chikskarangna didianiko on·angaha.
Ia salko manianio dongpae jinmana aganprakanggipa gipin manderangara, Tura Don Bosco College-ni Principal Fr Januarius S Sangma, Internal Complaints Committee-ni Coordinator Dr Barbara S Sangma aro gipinrang ong·a.