SHILLONG: A·gilsak gimiko balwa moila ong·batsranggipa jilla ine mingako man·ani ja·man Byrnihat-o donggipa pilak karkanarangkon audit ka·china ba name nipiltaichina gita a·dokni Chief Minister Conrad K Sangma, Meghalaya State Pollution Control Board (MSPCB)-na ge·etaniko on·angaha.
Audit-ko antisani gisepon matchote MSPCB, report-ko Forest & Environment Department-na on·na nanggen.
Iako department-ni official-rang baksa tom·e chanchirimangani ja·man a·dokni Chief Minister tik ka·angaha.
Byrnihat-ko a·gilsako balwa moila ong·batsranggipa jilla ine mingahani gimin adita salrangna skangsan Assembly-ni Budget Session-ko ong·atanio a·dokni Chief Minister, chanchirimdilangaha aro Byrnihat-ara Assam aro Meghalaya a·dokni simao ong·gipa biap ong·ani gimin ia biapni moila ong·aniko namatna apsan bakrime kamrangko ka·na tik ka·angahachim.
Byrnihat-o balwa moila ong·batatenggipa karkanarang gimikan Assam a·dokchipaksa ong·ani gimin iako namatna gita bakrime kamrangko ka·ani bidingo ua, Assam a·dokni Chief Minister Himanta Biswa Sarma-na chittikoba seataha.
Indake ong·engon, Assam a·dokchipak donggipa pilak karkanarangkon audit ka·na gita Assam Pollution Control Board (APCB)-de ja·kurangko de·chakataha ine koborko on·aha. Apsan daken Meghalaya sorkariba, Byrnihat-o donggipa pilak karkanarangkon nipilna gita tik ka·angaha.