SHILLONG: Sorkarini dakchakanirangko man·e Meghalaya Energy Corporation Limited (MeECL), adita rang·speaniko man·ahaoba tangka paisani gita neng·nikanirangde dongkuenga ine Budbar salo, a·dokni Power Minister AT Mondal parakataha.
MeECL-ko chalaianio tangka paisani gita neng·nikanirang dongkuenga indiba ia neng·nikanirangko chel·chakna gita uamang rakbee kamko ka·enga ine ua aganaha.
2027-2028 bilsirango game matchotna sienggipa NTPC-ni grorangna agrede MeECL-o gipin grorang dongjaha ine janapatengon, tangka paisani gita neng·nikanirangko namatna uamang adita somoirangko nangkuenga ine Mondal aganaha.
Bijolini gro donggipa manderang, an·tangtangni grorangko gamna man·na gita adita salrangna skangsan a·dok sorkari, One Time Settlement (OTS) Scheme-ko ra·gatahachim ine nikna man·a.
5 kw-na bate bijoli jakkalenggipa nokdangrangoniko a·dok sorkari, gong kror 119 grorangko man·pilna ka·dongenga aro ia gong kror 119-oni gong kror 25-kode komiatna miksongenga.
Power Minister-ni aganani gitade, MeECL-ko chalaianio noksan ong·na nangkuenga indiba uamang, manderangna rang·speaniko on·na miksongenga.
A·dok sorkarini ra·gate on·gipa OTS scheme-ko bang·a manderangan ra·tokengaha aro mikkangchi bang·bata manderangan ia scheme-ko ra·e, an·tangtangni grorangko chotnaba gnang ine ka·dongsoenga.