Game ge·e cha·giparangna rikgipa nokko matchote rikja ine GHADC-ko matnanga

WILLIAMNAGAR: East Garo Hills a·jani Williamnagar jolo, game ge·e cha·giparangni game ge·e man·gipa bosturangko donchakna gita rikgipa nokko matchote rike on·ja ine Garo Hills Youth Solidarity (GHYS), Garo Hills Autonomous District Council (GHADC)-ko matnangataha.
GHYS-ni president Endick M Marak-ni parakatani gitade, ia nokko bilsi 10-na skangan rikna a·bachengahachim indiba da·alonan ia nokko matchotgija donchipahani a·sel ian jolo songdongenggipa manderangna suk ong·gijaniko ra·baani gita ong·aha.
“Ia nokara, East Garo Hills a·jani headquarter Williamnagar nakuramon ong·ani gimin pilakan ia nokko nikna man·enga aro ia nokko matchotgija galchipe donengani a·sel ian Williamnagar jillani mikkimko ra·ongalani gitaba ong·enga. Ia nokko ia biapo rikgija, banoba manderang nikgijaosa rikna nangachim,” ine Marak parakataha.
GHYS-ni parakatani gitade, ia nokara, songo noko game ge·e cha·giparang aro bading chiwalgiparangna, bosturangko donchakna man·na gita rikgipa noksa ong·na nangachim indiba ia nokko rikanio kakket ong·ani aro on·kangani dongjani a·selan ia nokko matchotgija galchipe donaiengaha.
“GHADC-ni iandake kamko ka·anio gisik nangjani gimin aro iandake mongsonggipa project-rangko chu·sokatanio name ka·jahani gimin chinga namen suk ong·ja. East Garo Hills-ni manderangna iandakgipa project-rangko on·engon, nambate chu·sokatna nanga aro ia daiko GHADC ra·na nanga,” ineba GHYS-ni president Endick Marak parakataha.
Ia nokko matchotgija donchipaniara manderangni tangka paisarangko kragija dake jakkalsretani aro manderangna nangchongmotgipa nokrangko on·anio jegalani gita ong·aha ine janapatengon, “Ia nokko matchotatna ta·rake ja·kuko de·china ong·jaode ia nokko nitogija donani pal pe·galsrangchina chinga dabienga,” ine GHYS parakataha.