TURA: Skang somoirango gitcham Union Minister aro Lok Sabha-ni gitcham Speaker Purno A Sangma sagi, dingtang dingtang jatrangna chonchongipa a·dokrangko dabidile, India a·songni salgro salaram jolko bak dakna jotton ka·aha ine adita salrangna skang Manipur a·dokni gitcham Chief Minister N Biren Singh-ni matnanganiko Budbar salo, Garoland State Movement Committee (GSMC) Pedaldoba regiona unit-ba raken jegalataha aro Purno Sangma sagini chonchongipa a·dokrangko dabidilaniara jatrangna mikkang nie ong·ja indiba manderangona sorkarini kamrangko sepangbatatna miksonganiosa ong·a ine parakataha.
“PA Sangma-ni miksonganiko salgro salaram jol gimikon namniktoka aro ua salgro salaramnasan ong·aigija a·song gimikni namgninan rakbee kamko ka·gipa ong·achim. Uni chonchongipa a·dokrangko dabianiara salgro salaram a·dokrango songdongenggipa jatrangko ma·ekatna ong·ja indiba sorkarini kamrangko manderangona sepangbatatna miksonganisa ong·a. Linguistic Act 1956-o pangchake ua (Purno), Garoland, Kukiland aro dingtang dingtang Tribal a·dokrangna dabidilahachim. India a·songo dingtang dingtang jatrang, Linguistic Act-o pangchakesa dam 20-na baten gital a·dokrangko dabitokenga. America a·songoba chonchongipa a·dokrangko bikotaha indide maini gimin India a·songo man·jawa?” ine GSMC Pedaldoba regional unit-ni chairman Rimjen Ch Sangma sing·doataha.
PA Sangma sagini kamko Manipur a·dokni gitcham Chief Minister N Biren Singh-ni matnanganiara PA Sangma aro A·chik jatko matnangasan ong·aijaha indiba gital a·dokrangko dabienggipa dingtang dingtang jatrangko chonnikani gitaba ong·aha ineba Rimjen Sangma parakataha.
“Uni gimin ua (Singh), salgro salaram jolo donggipa Tribal-rango, A·chikrango aro Purno Sangma-ni nokdango kemako bi·na nangchongmota,” ine GSMC Pedaldoba regional unit-ni president dabiangaha.
“Chinga A·chikrang, India a·songni jakgitelaniko man·na skangonin dingtang a·dokko dabienga. Sonaram R Sangma sagi, Greater Garoland State-na British sorkari baksa dakgrikaha aro A·chik National Volunteers Council (ANVC)-ni somoirango bang·a manderangan janggirangko gimaatna nangaha. Da·alo GSMC-ba dingtang Garoland a·dokna dabidilengon, Manipur-ni gitcham CM N Biren Singh-ni chonchongipa a·dokrangko jegalaniara namen ra·chakna man·gijani ong·aha,” ine GSMC Pedaldoba regional unit-ni chairman parakataha.