SHILLONG: Meghalaya a·dokni State Reservation Policy (SRP)-ko nipiltaiani bidingo a·dok sorkarini songe on·gipa Expert Committee-ni report-ko re·baenggipa April 12 tariko on·na siengaha.
Expert Committee-ni report-ko chu·gimik tarimanaha aro ia report-ko April 12 tariko on·anggnok ine a·dokni Chief Secretary DP Wahlang, kobor ra·timgiparangna parakataha.
Ia Expert Committee-ko Justice (Retd) Mool Chand Garg chairman ong·e dilaha aro ia committee-o Justice (Retd) Dr Satish Chandra, Prof DV Kumar, Prof Chander Shekhar aro Prof Subhadip Mukherjee-ba membor ong·e dongpaahachim.
Meghalaya a·dokni dingtang dingtang biaprangona re·ange a·dokni manderang aro dingtang dingtang dolrang baksa gronge agangrikanio, sandie man·gipani bidingo chanchirimna gita Expert Committee, re·anggipa January jao Delhi-o tom·aniko ong·atangahachim.
Reservation Committee-ko nipilna gita sorkarini songe on·gipa Expert Committee, Garo Hills, Shillong aro Jowai-ko man·chape a·dokni dingtang dingtang biaprango tom·anirangko ong·atangahachim.
Ia State Reservation Policy-o Khasi-Jaintia-rangna 40 percent, Garorangna 40 percent, gipin jatrangna 15 percent aro Open Category-o 5 percent-ko kangani dongachim indiba re·anggipa bilsirangonin Khasi aro Jaintia Hills a·jani dingtang dingtang dolrang, ia Reservation Policy-ko gital dake taripiltaina dabitokahani gimin a·dok sorkari, dingtangmancha Expert Committee-ko songe on·angaha.