Ia mandeko so·otani maming chinrang dongja ine Police talata
SHILLONG: Antignimangna gimaenggipa Hungarian tourist-ni manggisiko Bristibar salo, East Khasi Hills a·jani buring damsaoniko man·aha indiba ia mandeni sianio maming ong·gija dakani chinrangko da·o dipet police-rang nikna man·kujaenga ine talataniko on·angaha.
Hungary a·songni tourist Puskas Zsolt, re·anggipa March 29 tariko Shillong songjinmaona sokbae, pring 3:45 bajimango, Laitumkhrah-o donggipa hotel-o kuturiko ra·aha. Apsan salni pring 9:00 bajimango ua hotel-oni ong·kate, local taxi-ko ra·angaha aro ia taxi uko, Sohra samba jolo donggipa Mawsahew songo donbaahachim. Ua biaponi ua, Nongriat-ona re·na miksonge, janggilo kebitgipa bag-ko keenba Mawkawir-chipakna ja·achi re·chakatangaha.
Songni bi·sarang ia mandeko, Mawkawir sambao aro Ramdait-oba nikrikaha indiba ia mande gimaenga ine April 2 tariko, Hungarian Embassy-oni police-rangna u·iataha.
Iani obostani bidingo kobor ra·timgiparangna talataniko on·angengon, “Ia mande gimaenga ine chinga April-ni 2 tariko koborko man·soaha aro untalan chinga ia mandeko Ramdait, Mawsahew aro Mawkawir songrangko man·chape dingtang dingtang songrangoniko sandina a·bachengataha. Ua jolo Mawkawir rong·kolba dongani gimin Police-rang, SDRF aro Drone Centre-ni sipairang baksa ning·tubate sandiangaha. Bristibar salni 1:30 bajimango doldok police-rang, ua biaponiko sandiaha aro ua jolo manderangni jakkalgija galchipgimin rama dilsa donga aro ua biaponikosa ia mandeni manggisiko man·aha,” ine East Khasi Hills a·jani Superintendent of Police (SP) Vivek Syiem aganaha.
Ia mandeni manggisiko Sukrobar pringo post mortem ka·aha aro da·o Forensic Science Laboratory (FSL)-ni official-rangba ning·tubate am·sandina re·baaha ineba Syiem parakataha.
Da·o dipetde ia mandeko so·ota ine aganna gita maming chinrangko man·kujaenga indiba post mortem report-ko man·ahaosa talbate ma·sina man·gen ineba SP parakataha.