SHILLONG: West Garo Hills a·jani Bhangarpur songo, Jal Jeevan Mission (JJM)-ni kamrangko matchotgija ka·ani gimin baditaba jarangna skangan a·dok sorkarina badi ka·doangahaoba da·alonan ia kamrangko matchotate on·kujaenga ine nikna man·aha.
Ia scheme-ara Greater Tikrikilla Water Supply Scheme-ni ning·o ga·akgipa scheme ong·achim aro ia scheme-ko 2021-2022 bilsirangon sorkari sanction ka·ahachim.
Bhangarpur songni dilgipa Mottior Hussain-ni u·iatani gitade, ia project-ko songni ge 558 nokdangrangna gong 10,94,640 korosrangchi ra·chakahachim. Department-o see rakkiani gitade, ia project-na gong 8,21,530 tangkarangko jakkalaha aro ge 90 nokdangrangna chi pipe-rangko sale on·manaha.
Indake ong·genchimoba ian dake sorkarini a·kanganiko Hussain jegalatskaaha aro ia nokdangrangna chi pipe-rangkoba ankuja aro ia nokdangrangona chi pipe-rangkoba sokate on·kuja ine parakatskaaha.
Hussain-ni u·iatani gitade, ia bilsini January jaon ua iani bidingo Public Health Engineering (PHE) Minister Marcuise N Marak-na sedoatenba, songona re·ange obostarangko niechina aro iani bidingo inquiry-ko dakchina didiatahachim. Iani bidingo ua joltangni MP, MLA, Deputy Commissioner aro PHE-ni Executive Engineer-naba u·iatahachim ine songni dilgipa aganaha.
Ia project-na agreba, 2022-23 bilsio gong 1,21,002 korosrangchi sanction ka·taigipa ‘Extension of Distribution System for left-out households under Tikrikilla Block’ project-ni giminba Hussain janapataha.
Department-ni see rakkianiko nikna man·ani gitade, ia project-na chamgimin tangka paisarangoni atako koros ka·manahaoba ia songna chi pipe sale on·anikon nikna man·kujaenga ine Hussain matnangataha.
Indake ong·engon, ia kamrangko ka·anio tangka paisa koros ka·anirangko sandirokchina, chi pipe-rangko sale on·na ku·rachakaniko chu·sokate on·china aro je manderangan ia project-ni tangka paisarangko jakkalsretanio jak donga, ua pilakni kosakon rakgipa ja·kurangko de·china Hussain dabiangtaiaha.