Council-ni chong·motgipa itihasko gisik ra·china Tynsong didianga
TURA: Garo Hills Autonomous District Council (GHADC)-ni chang 73-gipa Council Day-ko Sombar salo, Tura District Auditorium-o maniangaha aro ia salko manianio a·dokni Deputy Chief Minister In-charge District Council Affairs (DCA) Department Prestone Tynsong, GHADC-ni Deputy Chairman CG Momin, GHADC-ni Chief Executive Membor (CEM) Albinush R Marak, Deputy CEM Nikman Ch Marak aro gipin dilgiparangba bak ra·angtokaha.
Ia Council Day-ko manianio a·dokni Deputy Chief Minister Prestone Tynsong, tom·anio bak ra·giparangna aganprakengon, 1972 bilsio Meghalaya a·dokko man·e on·na aro a·dokni namroro silroroanina kamrangko ka·dilangahani gimin a·dokni skanggipa Chief Minister aro GHADC-ni skanggipa CEM Capt Williamson A Sangma-ko mittelpilangenba, Council aro a·dokni chong·motgipa itihasko pangnan gisik ra·china manderangko didiangaha.
Meghalaya a·dokko man·na skang Assam a·dokni ning·o district council-ko chalaiani gimin gisik ra·atpilangengon, Tribal-rangna District Council-ni gamchatgipa ong·ani gimin Tynsong aganangaha.
District Council-ni kamrangko aro daitorangko nipilchina didiangengon, district council-ko chalaianio chagrongna nanggipa neng·nikanirangko namatna gita pilakkon apsan bakrime kam ka·china DCA Minister didiangaha.
Sixth Schedule-ni gamchatgipa ong·ani bidingo janapatengon, Meghalaya a·dokni 96 ba 98 percent a·arangan ia gadango ga·akgiparangsa ong·ani gimin ian Tribal-rangko chengonin chel·chakbaenggipa niam ong·a ine Tynsong parakataha.
Meghalaya a·dokna Sixth Schedule-ara namen gamchatgipa ong·ani gimin Sixth Schedule aro Council-ni bilrangko bilakbatatna gita sorkari kam ka·enga ineba ua aganaha.
Ia tom·anio GHADC-ni CEM Albinush R Marak-ba jinmana aganprakengon, Garo Hills-ni ong·chengaoni ia somoiona togrikatenba, namen dingtanganiko nikna man·aha ine parakangaha.
District Council-ni bilsio chu·sokatgipa kamrangko aro dingtang dingtang department-rangoniko man·enggipa kajinarangni giminba Marak talate on·angaha.