TURA: South Garo Hills a·jani Nongalbibra jolrang, jekai Jadi Bazar, Nongalbibra bazar aro Nongalbibra Simsang dolongrango street light aro solar light-rangko donchina Garo Students Union (GSU) Nongalbibra regional unit dabiangaha.
Iani bidingo GSU Nongalbibra regional unit-ni dilgiparang, Garo Hills Autonomous District Council (GHADC)-ni Chief Executive Membor (CEM) Albinush R Marak-ko grongenba, memorandum-ko on·angaha.
GHADC-ni CEM-na sedoatgipa chittio GSU Nongalbibar regional unit-ni parakani gitade, Nongalbibra aro Jadi bazar jolrango street light-rang dongjani a·selan walni somoirangode manderang neng·nikanirangko chagrongna nangtokenga aro mongsongbate me·chikrangna re·a doanirango kenchakna nanganirang ong·enga.
“Nongalbibra bazar, Jadi bazar aro Simsang chibimako kabatgipa Nongalbibra dolongo street light-rang dongjani a·sel bazar anti re·giparang, mongsongbate me·chikrangna kenchakna nangani ong·enga. Uni gimin ia biaprango ta·raken street light aro solar light-rangko donchina chinga mol·molenga,” ine GSU Nongalbibra regional unit-ni general secretary Salgrak D Shira parakataha.
GSU Nongalbibra regional unit-ni parakatani gitade, ia biaprango street light aro solar light-rangko ta·raken sokate on·na jotton ka·gen ine GHADC-ni CEM-ba uamangna ku·rachakaniko on·ataha.
