SHILLONG: Assam aro Meghalaya a·dok damgnini simarango ong·enggipa golmalrangko namatna gita a·dok damgnini sorkarirang, skanggipa bako ta·raken kamrangko ka·e matchotatahaoba da·o bangki dongenggipa damdok biaprangko namatna gita a·dok damgnini gisepo gnigipa agangrikanide bon·chipskakuenga aro kamrangko a·bachengpiltaina gita Meghalaya sorkari, Assam sorkarina sengna nangkuenga.
Ia gnigipa agangrikaniko a·dok damgnini sorkarirang, batanggimin bilsirangon a·bachengatahaoba da·o bilsisa batpile agangrikanirang bon·chipengkua aro dolgnini gisepo agangrikaniko a·bachengpiltaina baditaba chang tarikrangko tik ka·ahaoba ia tom·anirangko ong·atchipna man·kujaenga.
Iani bidingo Ri Bhoi Regional Committee-ni Member Mayralborn Syiem, kobor ra·timgipa manderang baksa agangrikengon, chengonin a·dok damgnini simarango ong·enggipa golmalrangko namatchipna man·kujaenga aro iandakgipa golmalrangko namatnade somoirangko nangaia inesa aganchakaha.
“A·dok damgnini gisepo meligrikna man·jaenggipa biaprangko apsan nina aro apsan asonge chanchirimna gita bakan Assam sorkarichipakni chingna u·iatgen ine chinga ka·dongenga,” ine Syiem aganaha.
Ia gnigipa bako golmal ong·enggipa biaprangko namatna Assam sorkari gisik nangjaengama ine sing·on, ian namen chanchie ka·na nanggipa kamsa ong·a aro indita bilsirangna ia neng·nikanirangko namatchipna man·jajhaoba ia sorkari, ka·dongbee ja·kurangko de·chakatenba, a·dok damgnini gisepo ong·enggipa golmalrangko namatna kam ka·aha ine Syiem, mittelpilaniko parakataha.
Dolgni agangrikaniko ta·rakatna gita Meghalaya sorkari, Assam sorkarina sedoatgenma ine sing·anina aganchakaniko on·angskaengon, iani bidingo Meghalaya a·dokni Chief Secretary, Assam baksa agangrikjringenga ine Syiem aganaha.
Assam aro Meghalaya a·dok damgnini simarango ru·utbea bilsirangonin dam 12 biaprango meligrikgijanirangko nikna man·engachim indiba ia dam 12 biaprangoni damdok biaprangkode a·dok damgnini gisepo songgigrike, biaprangko sualgrikahachim. Da·o bangki dongkuenggipa damdok biaprangoba a·dok damgnini gisepo meligrikaniko ra·bana gita a·dok damgnini sorkarirang agangrikaniko a·bachengatahachim indiba ia agangrikanirang da·onan matchotchipskakujaengachim.
Ia a·dok damgnini simarango meligrikna man·jaenggipa biaprangko namatna ja·ku de·enggipa gnigipa bako man·chapenggipa biaprangara Langpih baksana Ri Bhoi a·jani Borduar, Nongwah-Mawtamur, Deshdoomreah, Block-II aro West Jaintia Hills-ni Block- I, Psiar – Khanduli jolrang ong·engachim.
A·dok damgnini gisepo meligrikna man·jaenggipa dam 12 biaprangoni skanggipa bako namatna soi ka·grikgipa biap damdokara, Gizang, Tarabari, Boklapara, Khanapara-Pilingkata, Ratacherra, aro Hahim ong·skaachim.
Ia meligrikna man·jaenggipa damdok biaprangoni sq km 18.51-ko Assam aro sq km 36.79-ko Meghalaya ra·na gita songgigrikahachim.