TURA: West Garo Hills a·jani District Administration, District Mineral Foundation baksa nangrime SPARK camp-ko Tikrikilla College aro Don Bosco Higher Secondary School-o ong·atangaha.
Ia SPARK camp-ko college aro higher secondary skulo poraienggipa chatro chatrirang, uamangni u·i-ma·siani aro changa sapanirangko mikkangchi janggi tanganio jakkalchina didina aro ra·dona miksonganio ong·atangaha aro ia camp-o sak 90-na baten chatro chatrirang bak ra·angtokaha.
Ia SPARK program-ni gita Tura-o bang·a chatro chatrirangan dakchakanirangko man·engani gimin apsan daken gipin chatro chatrirangba iani namgniko man·china gita Tikrikilla, Bhaitbari, Demdema aro a·jani dingtang dingtang biaprangonaba SPARK-ni gita chadamberangna uamangni changa sapaniko jakkale mikkangchi janggi tanganio jakkalna didianiko on·a miksonge ong·atenga ine official-rang aganaha.
Ia program-ara class-o skia gitade ong·janaba gnang indiba ia chadamberangni ba chatro chatrirangni changa sapaniko jakkale, mikangchi an·tangtangna janggi tangani cholrangko basegen iani gimin ma·siatna didiani gitasan ong·aia aro ian chatro chatrirangna u·iani baksa dal·roroanio mingsa dakchakbeani ong·gen ine Tikrikilla-ni Block Development Officer, Rikrak N Marak program-o bak ra·gipa chatro chatrirangna aganangaha.
Chatro chatrirangni namgnina iandakgipa program-rangko ong·atengani gimin Tikrikilla College-ni principal-ba mittelpilaniko parakangaha.
