Tura-o mikka balwa ta·rakanga, garirangko bol be·dapa

TURA: Sombar pringo, Tura aro samba jolrango mikka balwa ta·rakangaha aro bang·a biaprangon bol wa·arangni be·anirangko nikna man·aha.
Mikkarang, Sombar pring 1:00 bajimangonin jimbee wana a·bachengaha aro mikka baksana balwa ta·rakbee balangahani a·sel bang·a biaprangon bol be·anirangko aro bijoli silitingrango bol cheksirangni be·dapanirangko nikna man·aha.
Mikka balwa ta·rakanganichi, Tura-ni Upper Babupara jolo bol pangsa pangpikaha aro ia bol ka·mao donenggipa garirango be·dapeaha.
Kobor on·ani gitade, ia bol pangpikanio gari bolgni nosto ka·ako man·aha indiba ia gari bolgnioni, Maruti Car tangsim bilongbate nosto ka·ako man·angaha.
Mikkarang pring 6:00 bajimangona kingking waangaha aro balwarang ta·rakahani a·sel bol wa·arang bang·en be·ahani gimin bijoliko kimitna nangao ga·akaha.
Ja·mano State Disaster Response Force (SDRF) aro dingtang dingtang department-ni manderang, ramarango be·dapgipa bolrangko ra·galna dakchakeaha aro bol be·dapgipa bijoli silitingrangkoba MeECL-ni manderang ta·raken taripile on·angaha.
Da·o dipet, darang biaprangonikon mande siani ba saknaa man·ani giminde koborrangko man·soa dongkuja.
Indake ong·engon, da·o salbri salbongamangna a·dokni badiaba badiaba bakrango, mikka kimpretani aro balminduri baksa mikkarang waani cholrang donga ine Indian Meterological Department (IMD) Meghalaya-oniba, a·dokni manderangko mikrake dongchina u·iataha.