Dam 11 higher secondary skulrango gital stream-rangko on·e namdapatskagen
SHILLONG: Bristibar salo a·dokni Cabinet tom·e chanchirimangenba, SSLC porikkako pass ka·gipa chatro chatrirangna higher secondary skulrango biaprangko tikatna man·na gita a·dokni damdok sorkari secondary skulrangko higher secondary-ni gadangona ra·doatenba, da·o dongsoenggipa dam 11 higher secondary skulrango gital stream-rangko on·dape namdapatna tik ka·angaha.
Cabinet tom·a matchotani ja·man kobor ra·timgiparangna talataniko on·angengon, SSLC porikkako pass ka·gipa chatro chatrirangni namgnina a·dokni dingtang dingtang skulrangko namdapatna nangaha ine a·dokni Cabinet Minister aro MDA sorkarini ku·wattimgipa Paul Lyngdoh parakataha.
“A·doko lekka pora on·aniko tang·doatna nangenga maina da·o dipet higher secondary skulrango ge 12,000-mangni gita seat-rang chu·ongjaenga aro higher secondary skulrango stream-rangko sualaniba apsan ong·jaenga,” ine Lyngdoh aganaha.
Iandake chatro chatrirangna seat-rang chu·ongjaengani gimin a·dokni damdok sorkari secondary skulrangko higher secondary-ni gadangona ra·doatna Cabinet tik ka·aha ine Lyngdoh parakataha.
Higher secondary-ni gadangona ra·dona sorkarini tik ka·gimin sorkari skulrangara, East Jaintia Hills-ni Rymbai Secondary School, Umthlong Nongkhliew (Arts & Science stream gnang), Nongtalang Secondary School, Tirot Sing Memorial Secondary School, Tura Public School aro Jowai Public School ong·enga ine janapatengon, ia skulrangko higher secondary-ni gadangona ra·doatanichi komibeoba ge 9000 seat-rangko on·dapna sorkari ka·dongenga ine Lyngdoh parakataha.
Higher secondary skulrango gital stream-rangko ra·gatna gitaba ia tom·anio Cabinet ra·chakangaha ine janapatskaengon, science stream-ko Nongkhlaw-ni Tirot Sing Memorial HS School-o, commerce stream-ko Tura-ni Govt Boys HS School, West Garo Hills a·jani Dalu Secondary School, Baghmara HS School, Jowai-ni Govt Boys HS School aro Sokha HS School-o ong·gen ine Cabinet Minister aganaha.
“Ia skulrango Arts aro Science stream-rangde dongsoahani gimin da·o Commerce stream-koba man·gnok,” ine ua aganaha.
Je skulrangon Arts stream-rang dongkujachim, uandakgipa skulrangoba da·o Arts stream-ko man·gnok aro ia skulrangara, Jirang HS School, Resubelpara HS School aro Mawkyrwat-ni Maharam HS School ong·a ine Lyngdoh parakataha.
Unbaksana North Garo Hills-ni United Kharkutta HS School aro Malangkona HS School-o Science aro Commerce stream-rangko ra·gatna gitaba ia tom·anio Cabinet tik ka·angaha ine Lyngdoh aganaha.
Ia skulrangko ra·doatanichi bilsio gong kror 10 tangkarang koros ong·gen ine janapatskaengon, ia tangka paisarangko koros ka·anichi sorkari, a·dokni chatro chatrirangna namgipa lekka poraniko on·na ka·dongenga ine Lyngdoh parakataha.