SHILLONG: Gitcham Congress sorkarini somoio, a·doko bobil dake chakatenggipa Hynniewtrep National Liberation Council (HNLC) dolna tangka paisarangko dakchake on·aha ine matnanganirangko man·ahani gimin a·dokni Deputy Chief Minister Sniawbhalang Dhar-ko kam watchina, Meghalaya Pradesh Congress Committee (MPCC)-ba dabiangaha.
Iani bidingo jakgitelgipa agency-rangchi sandirokchina gitaba MPCC dabiangaha.
Gitcham Congress sorkarini somoio Dhar, tangka paisani gita dakchakanirangko on·aha ine adita salrangna skangsan HNLC bobil matnangatahachim.
Iani bidingo Dhar-ni kosako jegalatengon, “Jakgitele aro champenganigri sandirokna man·na gita ua (Dhar), minister-ni kamko wate on·na nanga ine chinga bebera·a. Iani bidingo sandirokengmiting somoio ua office-o ong·na man·jawa,” ine MPCC-ni secretary Manuel Badwar aganaha.
A·songni kosako iandakgipa kamrangko Congress dol raken jegala aro chakchike dongna man·jawa ineba ua aganaha.
Ainni kamrango Congress chu·gimik ka·dongenga ine janapatengon, iani bidingo sandirokanio uamang, authority-rangna chu·gimik bakrimaniko on·angaigen ine MPCC-ni secretary parakataha.
Ia kamo Congress dolde maming jak dongja ineba Badwar talataniko on·angaha.
Iani bidingo National Investigating Agency (NIA)-chi sandirokchina gita adita salrangna skangsan, Voice of the People’s Party (VPP)-ba dabiangaha.
Gitcham Congress sorkarini somoio Sniawbhalang Dhar, saksa minister ong·e tangka paisarangko dakchake on·achim ine HNLC bobil dolni a·kanganiara namen ra·chakna man·gijani ong·a ine VPP-ni dilgipa Batskhem Myrboh parakatenba, iani bidingo ta·raken sandirokchina aro uko Cabinet-oniko ra·galchina dabiangaha.