TURA: West Garo Hills a·jani Demdema Block ning·o MGNREGA-ni job card-rangko sualanio ong·gija dakanirang donga ine Confederation of Meghalaya Social Organisations (COMSO) badi ka·doangani ja·man, ia block-o pilak job card-rangko aro block-ni ning·o donggipa village employment council (VEC)-rangko name nipiltaichina Meghalaya sorkarini State Rural Employment Society (SRES), ge·etaniko on·angaha.
Demdema Block-o MGNREGA-ni job card-rangko 2020 bilsioni 2025 bilsiona sualanio apsan nokdangnan baditaba king job card-rangko on·aha, ia scheme-ni ning·o man·na nanggijagipa manderangkoba biming segataha, ABPS-ko taridapaha aro ia kamrango block-o kam ka·enggipa mitam manderang jak donga ine COMSO badi ka·doangahachim.
Indake ong·engon, job card sualaniko aro VEC-rangni bidingo name nipiltaianirang matchotkujaskal, gital work order-rangko ba electronic Muster Roll (eMR)-rangko VEC-rangna on·kujachina gita SRES-ni Mission Director SC Sadhu, ge·etaniko on·angaha.
Niam gri Job Card donggipa, mande donggijagipani bimingo tarigipa Job Card aro uandakgiparangko District aro Block office-rangna u·iatchina ge·etaniko on·angengon, iandake rim·a man·ani ja·man niam gri Job card donggipa pilak bimingrangkon den·galna man·gen aro nangani kri kajinarangko ra·pilna man·gen ine SRES-ni Director parakataha.
MGNREGA-ni kamrango pangnan parak ong·e kamko ka·china aro hisaprangko name rakkichina gitaba Sadhu ge·etaniko on·angaha.