SHILLONG: Madhya Pradesh a·doko donggipa Indore songjinmaoni re·bae Sohra jolo gimaenggipa jiksesaoni da·o dipet jikgipako man·pilkujaengon Budbar salo, ia mandeko sandienggipa sipai dolrang, raincoat kingsako, Sohrarim sambao donggipa Mawkma joloniko man·aha.
Iani bidingo kobor ra·timgiparangna u·iatengon, ia raincoat-ara, gimaenggipa Sonam Raghuvanshi-ni ong·ama ong·ja uko tale ma·sikujaenga ine East Khasi Hills a·jani Superintendent of Police (SP) Vivek Syiem parakataha.
SP-ni parakatani gitade, ia raincoat-o an·chini rong dakgipa dagirangba donga indiba ian an·chi ong·ama ong·ja ukoba police-rang name ma·sikujaenga.
Ia raincoat-ko forensic-chi porikka ra·e niani ja·mansa iani bidingo talbate ma·sina man·gen ine Syiem aganaha.
Ia me·chikni segipa Raja Raghuvanshi-ni sogimin manggisikode Sombar salon sandienggipa sipai dolrang, Weisawdong Fall-ni samba jolo donggipa a·dareoniko man·aha aro ia manggisiko man·ani ja·man police-rang, uko so·otna jakkalgipa attekoba man·aha.
Indake ong·genchimoba da·o dipet police-rang, ia mandeni jikgipa Sonam-kode man·skakujaenga aro ia me·chikko dingtang dingtang dolrang, chong·motan NDRF, SDRF, Fire & Emergency Service, SIT, SOT aro jolo songdongenggipa manderangoniba gimik sak 50-60-na baten dingtang dingtang biaprangoniko sandiengkua.
Budbar saloba ia dolrang, Weisawdong jolni diltugipa biaprangoniko ia me·chikko sandiangaha indiba mikkarang jimbee waahani a·sel name sandina man·jaha ine SP parakataha.