SHILLONG: Meghalaya Building Bye Laws 2021-ko taridapna gita Budbar salo, a·dok Cabinet-ni tom·anio ra·chakangaha.
Ia Building Bye Laws-ko Shillong songjinmani Secretariat Hills aro European Ward jolrangoba niam ong·atna taridapgen.
Iani bidingo kobor ra·timgiparangna talataniko on·angengon, Building Bye Laws-ni ning·o rokomgni niamrang, chong·motan Public aro Semi-public building-rang donga, jeon a·a ra·na man·aniko 50%-oni 60 percent-ona bariatna tik ka·aha ine a·dokni Chief Minister Conrad K Sangma parakataha.
“Uni gimin Secretariat Hills aro European Ward jolrango a·a ra·na man·aniko public aro semi-public building-rangna 50 percent-oni 60 percent-ona bariatgnok,” ine Sangma aganaha.
Indake ong·engon ia tom·anio, Integrated Eco-tourism and Sustainable Agri-based Livelihood Development Project in Meghalaya (IESALDPM)-koba ADB-ni dakchakaniko million dollar 145-ni pal million dollar 80-ona komiate Cabinet ra·chakangaha.
Ia project-na a·bachengoba ADB-ni gita million dollard 145-ko dakchake on·achim indiba dingtang dingtang a·dokrangna externally aided project (EAP)-rangko ma·mong sorkari komiatna tik ka·ahani gimin ia project-na ADB-ni dakchake on·anikoba million dollar 80-ona komiatna a·dok sorkari tik ka·angaha.
Una agreba ia tom·anio, Meghalaya Heritage Act 2012-ko taridapna gitaba a·dokni Cabinet ra·chakangaha.
Chief Minister-ni parakatani gitade, Living Root Bridge-ko World Heritage Site dakna UNESCO-ona proposal-ko on·na gita sorkari, Meghalaya Heritage Act 2012-ko taridapna tik ka·angaha.