TURA: Jangrapara-oni Rondupara-ona dakanggipa PWD rama namsrangjahani a·sel ia ramako re·ruraenggipa manderang aro songni nokni manderang neng·nikanirangko chagrongna nangtokenga ine A·chik Conscious Holistically Integrated Krima (ACHIK) Rondupara sub-unit parakatenba, ia ramako ta·raken taripile on·china a·dokni Chief Minister-ko didiataha.
Iani bidingo ACHIK Rondupara sub-unit-ni dilgiparang, dingtangmancha memorandum-ko a·dokni Chief Minister-na West Garo Hills a·jani Deputy Commissioner-ni jako on·ataha.
ACHIK Rondupara sub-unit-ni parakatani gitade, Jangrapara-oni Rondupara-ona dakanggipa ramara, ia jolrangona ma·manti nangchongmotgipa bosturangko sokatanio mongsonggipa rama ong·achim indiba da·o ia rama namsrangjahani a·sel nangchongmotgipa bosturangko salruraenggipa garirangba re·ruraanio neng·nikanirangko chagrongna nangtokenga.
“Ia rama jol gimikan da·o nosto ong·ahani a·sel ia ramao a·sel ong·anirangko, gari nosto ong·anirangko aro dingtang dingtang nangana re·ruraenggipa manderangni neng·nikanirangkoba knarongna man·enga. Ia rama namsrangjahani a·sel skul aro office-rangchi re·ruraenggipa manderangsan ong·aigija songo noko bading chiwale cha·enggiparang aro nangchongmotgipa bosturangko salbae on·enggipa manderangba neng·nikanirangko chagrongna nangtokenga,” ine ACHIK Rondupara sub-unit parakataha.
Jolo songdongenggipa manderangni namgninasan ong·aigija, ia rama gita re·ruraenggipa pilak manderangni namgninan ia ramako ta·raken taripile on·china gitaba ACHIK Rondupara sub-unit, a·dokni Chief Minister-ko didiataha.
