TURA: West Garo Hills a·jao ICAR-Krishi Vigyan Kendra (KVK)-ni Vikshit Krishi Sankalp Abhiyan (VKSA) program-ko re·anggipa May 31 tariko a·bachengataoni da·o chetgipa sal ong·aha aro ia bongagipa salo KVK-ni official-rang, dingtang dingtang department-ni official-rang baksa dingtang dingtang songrangona re·ange, songni manderangna agan-talatanirangko on·angaha.
Ia chetgipa salo, West Garo Hills KVK-oni dolgittam Krishi Rath dolrang, Dadenggre Mengkakgre-ni Asimgre, Sattegre aro Bolchugre, Rerapara C&RD Block-ni Dilni Amakgre aro Daronggre baksana Tikrikilla Block-ni Jangrapara aro Gaguapara songrangona re·ange, Pre-Kharif campaign-rangko ong·atangaha.
Ia dolrangko, Dr. Joyoshree Mahanta (SMS, Plant Pathology), Dr. Tarun Kumar Das (SMS, Agricultural Extension) aro Naorem Arun Kumar (SMS, Soil and Water Conservation) dilangaha aro uamang baksana ICAR-RC for NEH region-ni Dr. Christy Sangma (Scientist, Soil Science) aro Dr. Tasso Tayung, (Scientist, Fisheries), CSS-CAU-oni Dr. Nirenjan S aro gipin department-rangni official-rangba dongpaaha.
Game ge·e cha·giparangna agan-talatanirangko on·angengon, maikai ia gital chasongo gital gama ge·ani kolrangchi nambate gama ge·anirangko dakna man·gen, uarangni bidingo official-rang, game ge·e cha·giparangna agan-talatanirangko on·angaha.
Ia VKSA campaign-ko ong·atani miksonganiara, gama ge·anio jakkalgipa gital kolrangko aro gital bitchilni rokomrangko ma·siate on·na, Soil Health Card-rangko jakkalani gamchataniko u·iatna, sorkarini dingtang dingtang scheme aro policy-rangko u·iatna, game ge·e cha·giparangni u·i-ma·sianirangko knatime ra·na aro uandakgipa kamrangan ong·a.
Ia program-ko ong·atanio sak 522 game ge·e cha·giparang aro sak 821 me·chikrangko man·chape gimik sak 1343 manderang bak ra·angtokaha.
