SHILLONG: Bilsi 60 batpile ma·mong sorkariko chalaianio Congress dol, India a·songni salgro salaram jolrangko galchipe donahaoba da·o ia jolrango Bharatiya Janata Party (BJP)-ni dilanichi namroro silroroaniko nikna man·engaha ine Mongolbar salo, Union Ports, Shipping & Waterways Minister Sarbananda Sonowal a·kangataha.
Batanggimin bilsi 11-na a·songni Prime Minister Narendra Modi-ni dilanichi BJP sorkariko chalaianio, a·songni salgro salaram jolrangna pilakni gita namroro silroroaniko ra·bana man·aha ineba ua aganaha.
“Congress dol da·o an·tangtangni kamrangko rasong dakna mamingan dongsrangjaha. Bilsi 60 batpile a·songko dilsretanio uamang (Congress), salgro salaramni bimangkon nosto ka·aha maina ua somoirango salgro salaram a·dokrango dakgrik dinggrikani, bobil dake chakatani aro ma·manti ong·gija kamrangan gapahachim. Tom·tomanide ua somoirango jumang gitasan ong·aiahachim. Indiba da·alo Prime Minister Narendra Modi-ni bilakbee dilanichi, salgro salaram a·dokrango manderangni nanganirangko chu·sokate, cholrangko on·e, tom·tomaniko ra·bae, ku·mong nangrimaniko ra·bae ia jolrangko gital India-ni dal·roroenggipa Engine ong·atna man·aha,” ine Union Minister aganaha.
Bilsi 11-ni gisepo maikai Modi sorkari, songsalni pilak manderangnan dingtanganiko aro namroro silroroaniko ra·bana man·aha, uarangni giminba Sonowal janapangaha.
BJP-chi dilenggipa NDA sorkarini mongsonggipa kamrang, jekai Mission Organic Value Chain Development, PM Garib Kalyan Anna Yojana, PM-KISAN, Nari Shakti Vandan Adhiniyam aro uandakgipa program-rangni giminba Union Minister janapangaha.
2014 bilsio ma·mong sorkariko chalaichengaonin ia sorkari, salgro salaram jolrangna gisik on·na a·bachengaha ine janapatengon, ua somoioni ia jolrango bobil dake chakatani 64 percent-chi komiangaha aro salgro salaram jol gimikoni 75 percent-onikode Armed Forces Special Powers Act (AFSPA)-ko ra·galna man·aha ine Sonowal aganaha.
PM Modi-ni dilanichi salgro salaram a·dokrango, gong kror 44,859-ni ming 3,600-na baten project-rangko ra·chakaha aro dam 10 greenfield airport-rangko rikaha ineba Sonowal parakataha.
Shillong songjinmako mittele aganangengon, “Ian nitobegipa songjinma ong·a aro ia biapara Isolni pattigimin biap ong·a. Uni gimin an·ching uni nitoaniko, tourism sector-rango man·enggipa cholrangchi namroro silroroatenba manina nanga,” ine Sonowal aganaha.
Meghalaya a·dokna Modi sorkarini chamgipa tangka paisarangni gimin janapatengon, a·doko mingsinggipa biaprang, jekai Umiam Lake, Sohpetbneng, Krang Suri Falls, Siju Caves, aro Nokrek Reserve gita dakgipa biaprangko nitobatatna gong kror 244 tangkarangko chame on·aha ine Union Minister parakataha.