TURA: West Garo Hills a·jani Raksamgre Civil Sub-Division-ni ning·o donggipa Tikrikilla jolni Hatogaon Kokrajhar (Tilapara) jolrango Assam a·dokoni niam gri re·napbae dokkanrangko kulienga ine Pedaldoba, Raksamgre aro Hatogaon jolrango donggipa NGO-rang matnangatenba, ia jolrango kuligipa dokkanrangko ta·raken ra·galchina Garo Hills Autonomous District Council (GHADC)-ko didiataha.
Iani bidingo dingtang dingtang NGO-rang, chong·motan GSU North-West Zone, GSU Pedaldoba Regional Unit, ACHIK North-West Zone (West) aro Raksamgre Regional Unit, ASPF Pedaldoba Regional Unit, All Meghalaya Rabha Students’ Union, AYWO Raksamgre Regional Unit aro Hatogaon jolni Gaonburarang, GHADC-ni Deputy CEM aro Land & Revenue I/c Nikman Ch Marak-na badi ka·e sedoatengon, ia jolrangona Assam-oni Tribal ong·gijagipa manderang niam gri re·napbae aro GHADC-ni permission-ko ra·chenggija dokkanrangko kulienga ine parakataha.
Ia jolrango niam gri dokkan dakgiparang, garirangko skatang donengani a·sel, re·ruraenggipa manderang neng·nikanirangko chagrongna nangtokenga ineba NGO-rang matnangataha.
NGO-rangni parakatani gitade, iana skangba GHADC aro jolo songdongenggipa manderang, ia biaprango niam gri dokkan dakenggiparangko changgittamna kingking a·rikgalahachim indiba ia apsan biapon da·oba gipin biaprangoni re·bae, niam gri dokkanrangko kulitaiaha.
Ia jolrango niam gri kulie chalaienggipa dokkanrangara, GHADC-ni ning·o ga·akgipa biaprangan ong·a ine talataniko on·angengon, ia jolrango niam gri kuligipa dokkanrangni bidingo NGO-rang, re·anggipa May jani 9 tarikoba GHADC-na badi ka·doangahachim indiba da·alonan maming ja·kurangko de·chipkujaenga ine NGO-rang matnangataha.
Ia biaprango niam gri kulienggipa dokkanrangko ta·raken ra·galatchina gitaba NGO-rang, GHADC-ni Deputy CEM-ko didiataha.