TURA: Garo Hills-ni ro·ongrangko South West Garo Hills a·ja gita Bangladesh a·songona salaniko dontongchina, South West Garo Hills a·jao dingtang dingtang dolrangni nangrime bikotgipa Civil Society A·chik Welfare Organisation (CSAWO) dabiangaha.
CSAWO-ni president Tryans Ch Marak-ni parakatani gitade, ru·uta bilsirangonin Garo Hills-ni ro·ongrangko South West Garo Hills a·ja gita Bangladesh a·songona salangengani a·sel songni nokni manderangna, mongsongbate ramako re·ruraenggipa manderangna bang·en neng·nikanirangko ra·baengachim.
“South West Garo Hills a·ja gita Bangladesh a·songona ro·ongrangko salengani a·sel ramarang nosto ka·ako man·enga aro mongsongbate, skulrangchi re·enggipa chatro chatrirangna, saa ding·ako salangenggipa manderangna aro ja·achi re·ruraenggipa manderangna kenchakna nangani ong·enga. Ia rama gita truck garirango ro·ongrangko nangana bate salengani a·selan ian ramarango gari gorarangko apchangket ong·atan baksana rama sambao donggipa Ampati Civil Hospital-naba nangchakeaniko ra·baenga,” ine CSAWO-ni president parakataha.
South West Garo Hills a·jani ramarang nosto ong·atako man·jana gita aro manderangna re·ruraanirango kenchakna nanganirang dongjana gita Bangladesh a·songona ro·ong salruraaniko ta·raken dontongatchina CSAWO, a·dok sorkariko didiataha.