TURA: Selsella C&RD Block-ni Integrated Child Development Services (ICDS) ning·o bang·bata Anganwadi centre-rangkon matchote rikja aro badiaba biaprangode Anganwadi centre-rang dongan dongja ine All Meghalaya Minorities Labour Union (AMMLU), Social Welfare department-ni Director-na badi ka·doataha.
Social Welfare department-ni Director-na AMMLU-ni badi ka·e sedoatani gitade, Selsella Block-o Anganwadi Centre (ACW)-rangko matchote rika aro chu·gimikkon chalaienga ine sorkario see rakkianirang donggenchimoba, biapona re·ange nion, mitam biaprangode centre-rangko rikan rikja aro mitam biaprangode matchotgija rike galchipako nikna man·enga.
“Ian sorkarini tangka paisarangko kragija dake jakkalsretani aro kamrangko name nirokgijaniko mesokani ong·enga,” ine AMMLU-ni president Akhirul Islam parakataha.
Ia jolrango Anganwadi centre-rangko rika matchotgija galchipe donako bang·en nikna man·enga ine janapatengon, ian sorkarini bi·sarangna aro me·chikrangna miksonge on·enggipa namgnirangko nichanggalani aro jakkalsretani ong·enga ine AMMLU parakataha.
ICDS-ni dongimin niam gitade, bi·sarangna aro ma·giparangna nangchongmotgipa cha·ani ringanirangko antio salbongana on·na nangachim ine janapatskaengon, iani bidingo am·sandie nion, bang·bata Anganwadi centre-rangon, cha·ani ringanirang somoi gita sokja aro basakobarangde bosturang soksranggijako nikna man·enga ine AMMLU-ni president matnangataha.
Indake ong·engon, Selsella ICDS Project-ni ning·o donggipa pilak Anganwadi Centre-rangko ta·raken re·e nichina, kamrang matchotaha ineba biapo dongkugijagipa ACW-rangko am·sandichina, kamrangni bidingo departmental inquiry-ko dakchina aro matchotgija galchipe donenggipa pilak ACW-rangkon matchote rikatchina AMMLU, Social Welfare department-ni Director-ko didiataha.
Pilak centre-rangnan cha·ani ringanirangko tik ong·e on·china aro inquiry report-ko jinmana u·iatchina gitaba AMMLU didiataha.