SHILLONG: 2023-2024 bilsini Performing Grade Index (PGI)-o Meghalaya a·dokko ka·mabatsranggipa biapo donatahani gimin a·dokni Bharatiya Janata Party (BJP)-ba suk ong·gijaniko parakataha.
Iani bidingo kobor ra·timgipa manderang baksa agangrikengon, a·doko lekka porako tang·doatna gita a·dok sorkari, lower primary gadangonin kamrangko namdapatna nangenga ine Sukrobar salo, BJP Meghalaya-ni ku·wattimgipa M Kharkrang parakataha.
Kharkrang-ni aganani gitade, a·doko lekka porako tang·doatna gita skigiparangonin a·bachenge, chatro chatrirangni poraianirangko gisik nangbatatna gita skul nok aro dingtang dingtang kamrangko namdapatna nangenga.
Skigiparangni biapo sakgipin skigiparangko skulrango kam ka·ataniko bon·atchina didiatengon, Education department-ni official-rang, skulrangona re·e nirokjringna nangenga ine BJP-na ku·wattimgipa aganaha.
“Skul nokrang namjaode chatro chatrirangna poraina gisik nangja, uni gimin an·chingna skul nokrangkoba namdapatna nangchongmota,” ine Kharkrang aganenba, tang·dogimin a·songrang pilakan skanggipa lekka poraniosa tangka paisarangko koros ka·bata ine talataniko on·angaha.
600 point-rangoni, East Khasi Hills a·jaan 212 point-rangko man·e nambatgipa a·ja ong·aha aro uni ja·man East Jaintia Hills (180), Eastern West Khasi Hills (180), Ri-Bhoi (180), East Garo Hills (170), West Khasi Hills (169), West Jaintia Hills (168), South Garo Hills (168), West Garo Hills (167), South West Khasi Hills (166), aro South West Garo Hills (162) ong·skaaha.
600 point-rangoni North Garo Hills a·jade 155 point-rangkosan man·e namjabatgipa a·jarangoni gnigipa ong·aha aro una skang, Arunachal Pradesh a·dokni Longding a·jaba 145 point-rangkosan man·e namjabatgipa a·ja ong·aha.