Tura: Sonibar sal June 21 tarikko a·gilsak gimikon International Yoga Day maniengon, 120 BN CRPF sipai dolrang PA Sangma Stadium, Dakopgre-o ‘Yoga for One Earth, One Health’ katta ja·pango pangchake ia be·enni gita ranta ka·ani programko pringni somoio ong·atangaha. Ia program-o komibeoba sak 50 na batpile CRPF personnel rang bakko ra·angtokaha, jeon uamang ‘Yoga’ ranta ka·aniko dake an·seng baljoke dongani chol ko man·na gita an·tangtangko on·kangenba bakko ra·angtokaha.
Ia program ko ong·atengon be·enni gita, aro gisik ni gita tom·tomaniko man·na gita aro saksa sakgipin baksa meli-nangrime dongani chin gita ong·atangaha. Indake ia program-o dingtang dingtang bewalo be·enko ranta ka·aniko dakangan baksa dingtang dingtang bewalo rang·sitaniko ba ranta ka·angaha jekai Nadi Shodhana, Anulom Vilom, Bhastrika aro gipin ranta ka·ani, una agre gisik ni gita chanchibewalani koba ranta ka·e ‘Yoga’ ni namgniko dake niangaha.
Ia International Yoga Day 2025 ko maniengon 120 BN CRPF, Tura ni an·tangtangni songsalo re·mikkanganiko mesokan baksa CRPF personnel rangni an·seng baljokaniko man·na gita on·kanganiko mesokangaha jekon ‘Yoga’ ranta ka·anichi mande sakantini be·en bimang kraagita an·seng baljoke dongna man·a ine program ko ong·atangaha.
