WILLIAMNAGAR: Batanggimin sal somoirangonin East Garo Hills a·jani dingtang dingtang biaprango, gitcham Garo National Liberation Army (GNLA) bobil dolni dongnue donanggipa silchidarerangko man·engon, Mongolbar pringwaloba police-rang, Rongjeng jolo donggipa song damsani buringoniko adita silchidarerangko man·taiaha.
Police-rangni u·iatani gitade, iani bidingo koborko man·soani ja·man, Additional Superintendent of Police (ASP)-ni dilanichi Williamnagar aro Rongjeng police station-ni sipai dolrang, Sombar wal 11:30 bajimangonin, Rongjeng Police Station-ni ning·o donggipa Chikama songni diltugipa buringrangoniko am·sandina a·bachengaha.
Mongolbar pringni 2:00 bajimango ia sipai dolrang, buringo dape dongipa silchidare aro gulirangko man·aha ine police official-rang parakataha.
Ia biaponiko police-rangni man·gipa silchidarerangara, a·songo tarigipa pistol pongsa, AK guli rong 212, anti-aircraft guli rong 22, nosto ong·gimin anti-aircraft guli rong 13, rong 11 pellets aro 6.5 mm guli rong 52 ong·a.
Ia silchidare aro gulirangko sakkirangni mikkango police-rang ra·baaha aro ia jolrango dongnue donkuenggipa silchidarerang dongkuengnaba gnang ine am·sandianirangko dakengkua.
Batanggimin somoirangoba East Garo Hills a·jani dingtang dingtang biaprangoniko GNLA bobil dolni dongnue donanggipa bang·bea silchidarerangko police-rang man·ahachim ine nikna man·a.
Garo Hills-o bobil dake chakatanirang bilongengmiting somoirango, GNLA-ni gitcham commander-in-chief Sohan D Shira sagi, silchidare aro gulirangko Simsang chibimani nalsao donggipa Durama a·brini ja·rekrango dongnue donahachim ineba police-rang u·iataha.
Sohan-ni siangani ja·man, uni dongnue donanggipa bang·bea silchidarerangko police-rang man·aha aro da·omangba uni dongnue donanggipa silchidarerangko dingtang dingtang biaprangoniko man·engkua ine nikna man·a.
