Tura: Dadenggre-o artificial football turf-ko tarie on·china Chief Minister Conrad Sangma-na Dadenggre Progressive Students’ Association (DPSA)-ni gita lekka see on·gipao mol·mole janapataha.
Meghalaya a·dok gimiko gital ge-25 artificial football turf-ko tarie on·a ra·chakanio pangchake uamang mol·molangenga ine DPSA aganaha.
“Meghalaya a·doko gitchambatsranggipa Civil Sub-Division-rangoni ge·sa headquarter ong·e Dadenggre namgipa kal·chakramrangko man·chape dingtang dingtang kal·susaanina rika cho·anirango komienga. Artificial football turf-ko tarie on·a man·genchimode joltangni chadamberangna aro robol kal·susana namnnikgiparangna bilongen namgni ong·gen aro kal·na changgiparangko ma·sianggen jemangan Meghalaya-na mikkim rasongko ra·bagen. Ia ja·ku de·ani Dadenggre-o kal·susaanikosan namroroata ong·jawa indiba a·dokni robol kal·susaanina on·gilaniba ong·gen,” ine DPSA membor-rang aganangaha.
DSO-WGH-ni office-ni dakchakanichi re·baenggipa 2026 bilsio gital Dadenggre League-ko a·bachengatgen aro sub-division gimikoni club-rang bakko ra·anggen aro ian Meghalaya State League-ona chol ramako mesoke on·gipa ong·gen, ine DPSA-ni membor-rang aganaha.
“Tura-o District Football Association-ni gita a·bachengatgipa ong·e Tura League-o Dadenggre-oni football club-rang bakko ra·angna cholko mejamangmang man·aha. Artificial turf-ko tarie on·a ong·ode Dadenggre League-ko ian sokchakna kragipa biap ong·gen, aro joltangni robol kal·susaaniko namroroatna man·gen,” ine uamang aganaha. Project, joltangni community-na gamchatgipa ong·gen, ine agandapangaha.
