TURA: Tura-ko Winter Capital songchina dabienggipani bidingo manderangna talatanirangko on·na gita re·anggipa Sonibar salo, A·chik State People’s Front (ASPF)-ni chang 17-gipa tom·bimonganiko West Garo Hills a·jani Tikrikilla jolo donggipa Jangrapara songo ong·atangaha.
Ia tom·bimonganiko ASPF Jangrapara unit sokachakaha aro ia tom·bimonganio, dingtang dingtang songni Nokmarang, Sordarrang, me·chik dolrang aro chadamberangba bak ra·angtokaha.
Ia tom·anio dingtang dingtang dolrang, jekai AHAM, AYWO aro GSMC-ni dilgiparangba bak ra·angtokaha.
Ia tom·bimonganio, ASPF-ni general secretary, jinmana aganprakengon, Tura-ko Winter Capital songaniara Meghalaya a·dokko man·e on·dilanggipa pagitchamrangni ku·rachakgimin kattarangan ong·a aro iani bidingo A·chik a·songni manderangna u·iatna aro ia dabianio bakrimaniko on·china didina gita ASPF, Garo Hills-ni pilak biaprangon awareness program-rangko ong·atenga ine parakataha.
Garo Hills-ni namroro silroroanina Tura-ko Winter Capital songna nangchongmota ine janapatengon, ia dabianio Garo Hills-o songdongenggipa pilak manderangkon bakrimchina gita Marak didiangaha.
Ia dabianio Garo Hills-ni pilak dilgiparangkoba ku·cholsan ong·e bakrimchina gitaba ua didiangaha.
Ia tom·aniko ong·atanio GSMC-ni acting chairman Balkarin Ch Marak aro gipin dilgiparangba aganprakengon, Tura-ko Winter Capital songchina dabiani chu·sokgipa ong·na man·na gita Garo Hills-o songdongenggipa mande sakantikon ku·mong nangrimchina gita didiangaha.
Winter Capital-ni bidingo ASPF-ni chang 17-gipa tom·aniko ong·ata
Date:
Share post:
