TURA: Tura songjinmani biap damgni, chong·motan Goanang aro Nehru Park-o rikgipa Outdoor Open Gym-rangko Mongolbar salo, a·dokni Chief Minister Conrad K Sangma-ni jakchi kulie on·angaha.
Ia Outdoor Open Gym-rangko kulie on·anganio a·dokni Chief Minister, tom·anio bak ra·enggiparangna aganprakengon, Tura-o songdongenggipa manderangko an·seng baljoke dongna gita ranta ka·china ia gym-rangko kuliaha ine parakataha.
Goanang-o donggipa Tura Botanical Garden-ko nambate tarina gong kror 3.8 tangkarangko chamataha ine janapatengon, ia Botanical Garden-o walkway, canopy walk aro cafeteria-ko done nambatatna tik ka·aha ine Chief Minister parakataha.
Ia outdoor gym-rangko kulianichi, manderang an·tangtangko an·seng baljoke rakkina cholrangko man·gnok ine janapatengon, Tura songjinmani gipin biaprangoba iandakgipa outdoor gym dambongako sorkari kulidapna sienga ine Sangma parakataha.
Tura-ni Nehru Park-o bi·sarangna kal·chakani biaprang, skie ra·chakanirang aro gipin biaprangoni re·bagipa manderangna nie ra·ani biaprangko taridapgen ineba Chief Minister parakataha.
Ia apsan salon, Goanang Multi Facility Building-koba Chief Minister-ni jakchi nokdonggae on·angaha aro ia nokko nokdonggae on·anio, West Garo Hills a·jani Deputy Commissioner Vibhor Aggarwal, Superintendent of Police Abraham T Sangma, Meghalaya Board of School Education (MBOSE)-ni Principal Director Rikse R Marak, Goanang Baptist Mondolini Rev Greaterburn R Marak, Goanang gittimni Nokma Lonerson Ch Marak, Goanang Development Committee-ni membor-rang aro jolo songdongenggipa manderangba bak ra·angtokaha.
