SHILLONG: 2014 bilsio gitcham ANVC aro ANVC-B dolrang baksa ma·mong aro a·dok sorkarirangni songgigrikanio soi ka·grikaniko a·dok sorkari bon·chipatenga ine Tura-ni MDC aro BJP-ni state vice president Bernard N Marak-ni matnangatani ja·man, Garo Hills aro Autonomous District Council (ADC)-rangni namgnina ia songgigrikaniko ta·raken chu·sokatchina Opposition dolni dilgipa Mukul Sangma-ba a·dok sorkario dabiangaha.
Sangma-ni parakatani gitade, ia songgrikaniko a·dok sorkari chu·sokatchipjaengani a·selan ru·uta bilsirangna bobil dake chakatgipa ANVC dolrangko bame on·aniona rimbana aro ADC-rangko mangrakbatatna rakbee kam ka·aniko nisie galani gita ong·enga.
ANVC dolrang baksa songgigrikaniko a·dok sorkari, 2018 bilsionin bon·chipatenga ineba ua matnangataha.
ANVC dolrang baksa songgigrikanio mongsonggipa bakara ADC-rangna daitorangko tikatanio, name nipilna aro ku·pattianirangko on·na gita State Finance Commission-ko songanian ong·a ine janapatengon, ia commission-ko 2012 bilsion songahaoba ua somoio ANVC dolrangni songgigrikna dongimin niamrangko nipilengmitingsa ong·ani gimin kamrangko a·bachengatkujachim ine Sangma parakataha.
Ia songgigrikaniko jako ra·na gita daitorangko ADC-rangna, uamangni executive committee-rangna aro bak ong·enggipa political party-rangnaba on·na nanga ineba Opposition dolni dilgipa aganaha.