TURA: Garo Hills Autonomous District Council (GHADC)-o ong·enggipa obostarangni bidingo aro Tura Medical College-ko Public-Private Partnership (PPP)-ni bewalo sorkarini chalaina miksongenggipani bidingo adita salrangna skang, a·dokni Chief Minister Conrad K Sangma aro dingtang dingtang dolrangni tom·e chanchirimengmiting somoio MBBS chatro saksa, Chief Minister aro ja·delgimin manderangni mikkango kragija dake mesokaha ine National People’s Youth Front (NPYF)-ni matnange kema bi·china dabianiko Garo Hills-ni dingtang dingtang Civil Society Organisation (CSO)-rang, chong·motan New Tura Development Forum (NTDF), Garo Graduates Union (GGU) aro Tura Garo Senior Citizens Forum (TGSCF) raken jegalataha.
“Nama bewalo aro saksa sakgipinko mande ra·grike agangrikna nangani gimin NPYF-ni agananiko chinga ra·chaka indiba ua somoio MBBS chatro saksako CM aro dal·batgiparangni mikkango ong·gija dake mesoka ine agananiko chinga raken jegala. Ia tom·anio chinga ia chatroni maming ong·gija dake mesokaniko nikna man·jaha indiba ua jinma chanchirimanio an·tangni nangnikanirangkosa aganaiaha. Ua saksa medical-ko poraigipa chatro ong·e Tura Medical College-ko namao chalaina gitasa Chief Minister-na an·tangni agan-ku·pattianirangko on·paaha. Tura Medical College-ko PPP mode-o chalaianio namgijanirangko niksamsoesa ua an·tangni ku·rangko on·paaha,” ine TGCSF-ni secretary LC Momin, gipin dolrangni pal parakataha.
Ia chatro, Chief Minister-ko aro gipin ja·delgimin manderangko mande ra·gija mesokaha ine NPYF-ni matnanganiko jegalatengon, uni agananio ua maming dakeba CM aro gipin dilgiparangko mande ra·gija mesokaniko uamang nikjahani gimin ia chatro, darangoba kema bi·na nangani katta dongja ine CSO-rang parakataha.